ShYU-nyń mereitoilyq sammiti aiasynda Qazaqstan Prezidenti Qasym-Jomart Toqaev pen Resei Prezidenti Vladimir Pýtin kezdesti, dep habarlaidy ult.kz.
Kezdesýde taraptar Qazaqstan men Resei arasyndaǵy dostyq, tatý kórshilik jáne odaqtastyq qatynastardyń qarqyndy damyp kele jatqanyn atap ótti.
Vladimir Pýtin Qasym-Jomart Toqaevty Quryltai sailaýynyń tabysty ótýimen quttyqtady. Resei Prezidentiniń pikirinshe, daýys berý nátijeleri Toqaevtyń Qazaqstandy odan ári damytýǵa, ishki turaqtylyqty nyǵaitýǵa, ekonomikany ilgeriletýge jáne halyqtyń ál-aýqatyn arttyrýǵa baǵyttalǵan saiasatynyń qoldaý tapqanyn kórsetedi.
Toqaev óz kezeginde quttyqtaýy úshin Pýtinge alǵys aityp, Qazaqstandaǵy konstitýtsiialyq reforma aiasyndaǵy jumystarǵa toqtaldy.
«Qazaqstandy jańǵyrtý úderisi ulttyq múddemizge sai jalǵasa beredi. Aty bar, zaty joq reformalar júrgizýge múldem bolmaidy. Eń aldymen, halqymyzdyń keleshegin oilaýymyz qajet», – dedi Prezident.
Memleket basshysy sondai-aq Reseidiń Qazaqstannyń basty investitsiialyq jáne saýda seriktesteriniń biri bolyp qala beretinin aitty. Onyń sózinshe, eki el arasyndaǵy saýda-sattyq kóleminde ósim baiqalady, al Úkimet buǵan deiin qol qoiylǵan kelisimderdi iske asyrýǵa kirisken.
Vladimir Pýtin de ekijaqty bailanystardyń barlyq baǵytta qarqyndy damyp kele jatqanyn atap ótti. Ol ótken jyly elder arasyndaǵy taýar ainalymy jaqsy kórsetkishke jetkenin, biyl da ósim bar ekenin aitty.
Resei Prezidenti gýmanitarlyq bailanystardyń jandana túskenin de atap ótti. Onyń málimetinshe, qazir 60 myń qazaqstandyq stýdent Reseidiń joǵary oqý oryndarynda bilim alyp jatyr. Sonymen qatar Ombyda Qazaqstannyń joǵary oqý ornynyń filialy ashylǵan.
Kezdesý barysynda taraptar saýda-ekonomikalyq jáne investitsiialyq yntymaqtastyqty nyǵaitý, birlesken jobalardy iske asyrý máselelerin talqylady. Sondai-aq halyqaralyq jáne óńirlik kún tártibindegi ózekti máseleler jóninde pikir almasty.
