Qaraǵandyda Shahter kúnine arnalǵan úlken kontsertte óner kórsetkennen keiin álemge áigili qazaqstandyq ánshi Dimash Qudaibergen Qarmet kompaniiasynyń Kostenko atyndaǵy shahtasyna bardy.
Sapar barysynda óner iesi kásiporynnyń jumysymen tanysyp, jer astyna 700 metr tereńdikke tústi. Sondai-aq ol shahta qyzmetkerleriniń ornalasqan jerin naqty ýaqyt rejiminde baqylaýǵa múmkindik beretin personaldy pozitsiialaý júiesiniń jumysyn kórdi.
«Qaraǵandyda 250 myńǵa jýyq adam jinalǵan Shahter kúnine arnalǵan úlken kontsertten keiin Qarmet kompaniiasynyń Kostenko atyndaǵy shahtasyna bardym. Jer astyna 700 metr tereńdikke túsip, shahterlerdiń qandai jaǵdaida jumys isteitinin, bul jumystyń qanshalyqty kúrdeli ári jaýapty ekenin óz kózimmen kórdim. Maǵan shahtanyń jumysy, jer astyndaǵy adamdardyń ornalasqan jerin baqylaýǵa múmkindik beretin zamanaýi qaýipsizdik jáne pozitsiialaý júieleri kórsetildi.
Shahtalardyń jańartylyp jatqany qýantady. Eń bastysy – shahterlermen jeke kezdesip, olardy kásibi merekesimen quttyqtaý múmkindigine ie boldym. Bul mamandyq ielerine degen qurmetim erekshe. Eńbekterińiz airyqsha qurmetke laiyq! Shahter kúni qutty bolsyn! Denderińizge saýlyq, otbasylaryńyzǵa amandyq jáne qaýipsiz aýysym tileimin! Raqmet, Qarmet!» – dedi óner iesi.
Óner iesi úshin bul sapar zamanaýi jerasty óndirisi men qaýipsizdik tehnologiialaryn ǵana emes, kún saiyn júzdegen metr tereńdikte eńbek etetin adamdardyń jumysyn kórýge de múmkindik berdi.
Kostenko atyndaǵy shahtaǵa barý – shahterlerdiń eńbegine jáne Qaraǵandy óńirindegi kómir salasynyń turaqty jumysyn qamtamasyz etip otyrǵan jandarǵa kórsetilgen taǵy bir qurmettiń belgisi boldy.
