Memleket basshysy Qasym-Jomart Toqaev Koreia Respýblikasynyń Premer-ministri Han Son Sýkpen kezdesti. Prezident Koreia úkimetiniń basshysy bolyp taǵaiyndalýymen quttyqtap, jańa qyzmetine tabys tiledi, dep habarlaidy Ult.kz.
Qasym-Jomart Toqaev Qazaqstan men Koreia arasyndaǵy qarym-qatynastardyń turaqty damyp kele jatqanyn atap ótti.
«Búginde qazaq-korei qarym-qatynastary turaqty túrde jaqsy damyp kele jatyr. Strategiialyq áriptestigimiz aiasynda qos tarap úshin de paidaly bolatyn kóptegen mańyzdy bastamalar júzege asyrylýda. Sizdiń elińiz Qazaqstannyń on iri saýda jáne investitsiialyq seriktesiniń qataryna kiredi. Qazaqstanda korei kapitaly bar 1 myńnan astam birlesken kásiporyn jumys isteidi. Biraq aldymyzda turǵan jaýapty mindet óte kóp. Sizdermen birge josparlarymyzdy oidaǵydai iske asyramyz dep oilaimyn», – dedi Prezident.
Memleket basshysy Qazaqstanda qolaily iskerlik jáne investitsiialyq ahýal qalyptasqanyn aitty. Onyń sózinshe, elde Koreianyń iri korporatsiialarymen qatar, shaǵyn jáne orta biznes ókilderine de jumys isteýge jaǵdai jasalǵan.
Bul baǵytta Saýda-ekonomikalyq jáne ǵylymi-tehnikalyq yntymaqtastyq jónindegi úkimetaralyq komissiia men Iskerlik keńes jumys istep keledi. Sonymen qatar eki el arasyndaǵy yntymaqtastyqtyń qajetti quqyqtyq negizi qalyptasqan.
Prezident Koreia Premer-ministrine qazaq-korei kásipkerleriniń dóńgelek ústeline qatysqany úshin alǵys bildirdi. Qasym-Jomart Toqaev jiyn barysynda qol qoiylatyn qujattar ekijaqty bailanysty odan ári damytýǵa yqpal etetinine senim bildirdi.
Sondai-aq Memleket basshysy Koreia Prezidenti Li Chje Miońmen ótetin kelissózderdiń mańyzyn atap ótti. Onyń pikirinshe, bul kezdesý eki el arasyndaǵy qarym-qatynastyń jańa kezeńine jol ashýy múmkin.
Kezdesýde saýda-ekonomikalyq jáne investitsiialyq yntymaqtastyqtyń basym baǵyttary da talqylandy.
Prezidenttiń aitýynsha, Qazaqstan men Koreia aldynda ekijaqty taýar ainalymyn eki ese arttyrý mindeti tur. Ol úshin saýda kólemin ulǵaitýmen qatar, qosylǵan quny joǵary taýarlardyń úlesin arttyrý qajet.
Osyǵan bailanysty Qazaqstan Prezidenti 2027–2030 jyldarǵa arnalǵan saýda-ekonomikalyq jáne investitsiialyq yntymaqtastyqtyń keshendi baǵdarlamasyn ázirleýdi usyndy.
Budan bólek, óndiristi jergiliktendirý jáne qazaqstandyq ónimdi úshinshi naryqtarǵa shyǵarý baǵyttaryn qamtityn óndiristik kooperatsiianyń jeke jol kartasyn daiyndaý qajettigin aitty.
Sóz sońynda Qasym-Jomart Toqaev Qazaqstannyń Koreiamen yntymaqtastyqty odan ári jan-jaqty nyǵaitýǵa daiyn ekenin jetkizdi.
