Atyraýdaǵy №2 qalalyq sotynda oblystyq Densaýlyq saqtaý basqarmasynyń burynǵy basshysy Mánshúk Aimurzievaǵa qatysty is qaralyp jatyr. Alǵashqy sot otyrysy 24 aqpanda ótti, dep habarlaidy "Ult aqparat".
Oblystyq sottyń baspasóz qyzmetinen málim etkendei, sotqa deiingi tergeý jedeldetilgen rejimde qaralǵan. Sebebi basqarmanyń eks-basshysy Mánshúk Aimurzieva óz kinásin moiyndap, protsessýaldy kelisim jasaýǵa niet bildirdi. Osyǵan orai onyń isi kýágerlersiz qaralýda. Ol Qylmystyq kodekstiń 371-baby 2-bóligi boiynsha (aýyr saldarǵa ákelip soqqan salǵyrttyq) aiyptalýda.
Eń aldymen, oǵan jańa týǵan shaqalaqtardyń ólim-jiti boiynsha statistikalyq málimetterdi burmalady degen aiyp taǵylýda. Zardap shegýshi tarap – Atyraý oblysynyń ákimdigi. Tergeýdi Syibailas jemqorlyqqa qarsy is-qimyl departamenti júrgizdi.
Sottyń kelesi otyrysy 27 aqpanda jalǵasady.
Eske salaiyq, 2019 jyldyń qyrkúiek aiynyń sońynda Atyraý oblysynda Perinataldyq ortalyqtyń bas dárigeri men ginekology jańa týǵan náresteni tońazytqysh kamerasyna salyp óltirdi degen kúdikke ilingen bolatyn. Keiin Perinataldyq ortalyqta jumys isteitin 35 meditsinalyq qyzmetker óz erkimen jumystan shyǵýǵa aryz jazdy.
Mánshúk Aimurzieva eldi dúrliktirgen osy oqiǵadan keiin byltyrǵy qazanda oblystyq Densaýlyq saqtaý basqarmasynyń basshysy qyzmetinen óz erkimen ketti. Ol bul laýazymǵa 2017 jyldyń sáýirinde kelgen bolatyn. Sol jyly onyń buiryǵymen oblystyq perzenthananyń bas dárigeri qyzmetine Qýanysh Nysanbaev taǵaiyndalǵan edi.
