Atyraý perinataldyq ortalyǵyndaǵy náreste ólimine qatysty is boiynsha basty kúdikti Qýanysh Nysanbaevtyń advokaty Aslan Jolbolov kútpegen málimdeme jasady. Onyń pikirinshe, tergeý barysynda náresteniń máiiti aýystyrylǵan bolýy múmkin. Bul týraly Aq Jaiyq jazdy, dep habarlaidy Sputnik.kz.
Advokat Aslan Jolbolov jekelegen dálelderdiń, atap aitqanda, Qaraǵandy oblysy boiynsha sot saraptamalary institýtynyń komissiialyq saraptamasynyń qorytyndysy jaramsyz ekendigin málimdedi.
"Osy qorytyndy negizinde meniń qorǵalýshym Nysanbaevqa Qazaqstan Qylmystyq kodeksiniń 99-baby boiynsha asa aýyr qylmys jasady degen aiyp taǵylyp otyr", - dedi Jolbolov.
Ol aldymen Batys Qazaqstan boiynsha sot saraptamasy institýtynyń alǵashqy saraptamasyna toqtaldy. Onyń pikirinshe, munda da daýly máseleler bar.
Qylmystyq is materialdaryna sáikes, saraptamadan keiin náresteniń máiiti Oraldan 2019 jyldyń 30 qyrkúieginde qaitadan Atyraýǵa jetkizilip, sol kúni ata-anasyna qaitarylǵan. Alaida, Jolbolovtyń aitýynsha, 2020 jyldyń 7 qyrkúieginde sotta oraldyq sarapshylar atyraýlyq sybailas jemqorlyqqa qarsy kúres qyzmetkerleri ony 2019 jyldyń 11 qazanynda qorytyndymen birge alyp ketti dep jaýap bergen.
"Meniń áriptesim advokat Jambyl Muqashev osy sáikessizdik týraly birneshe ret aitqan, biraq sot ony eskermegen. Endi men Qaraǵandyda jasalǵan komissiialyq saraptamanyń qorytyndysyna nazar aýdarǵym keledi. Biylǵy 9 qazanda men ádilet ministrliginiń sot-saraptama ortalyǵyna "zertteý obektisine berilgen nómir saraptama qorytyndysynyń nómirine sáikes kelýi kerek pe?" degen advokattyq saýal joldadym. Bul saýalǵa oń jaýap aldym. Endi qarańyz: zertteý obektisine berilgen nómir - №14-651/23-3-257K. Bul mynadai maǵynany bildiredi: 14-651 - zertteý obektisi tirkelgen rettik nómiri, iaǵni, tirkeý jýrnalyna sáikes, jábirlenýshi Turymbetovanyń nárestesiniń máiiti. 23-3 – saraptama shifrlary, 257K – komissiialyq saraptama nómiri. Bul rette, qorytyndyǵa jalǵanǵan sýretke sáikes, zertteý obektisi 14-652/23-3/257K nómirli material boldy. Tsifrlar sáikes emes - meniń pikirimshe, bul basqa máiit ekendigin bildiredi, - dedi Jolbolov.
"Bilmeimin, bul qate me, basqa nárse me, biraq ári qarai №14-652 nómirge sol tergeý-jedel toby taǵaiyndaǵan basqa Aitmuratova degenniń sábiiniń máiitine qatysty material tirkelgen. Ári qarai №14-563 material Roza Moldaǵalievaǵa qatysty. Aitmuratovanyń kim ekeni bizge belgisiz, ol osy qylmystyq istiń materialdarynda joq", - dep tolyqtyrdy advokat.
Onyń aitýynsha, sondai-aq konteinerdi mórleý kezinde óreskel zań buzýshylyqtarǵa jol berilgen, bul da Turymbetovanyń nárestesiniń máiiti zerttelmegen degen kúdik týdyryp otyr.
"Osy qarama-qaishylyqtardy eskere otyryp, men 2019 jylǵy 20 jeltoqsandaǵy 14-651/23-3-257k nómirli keshendi sot saraptamasynyń qorytyndysyn is boiynsha jaramsyz dálel dep tanýǵa ótinish beremin. Sondai-aq, bul jaǵdaida náresteniń máiiti – sot-meditsinalyq zertteý obektisiniń aýystyrylǵany týraly málimdeme jasaýǵa májbúrmin. Muny kim, qandai maqsat úshin jasady, meniń oiymsha, ýákiletti organdar anyqtaýy tiis", dep túiindedi Jolbolov.
Sýdia Gúlmira Dáýletova tanysý úshin qujattardy prokýror Nurjan Jangereevke berýdi surady. Ekinshi prokýror Magomed Esenbolatovty sýdia ótken otyrystardyń birinde protsesten shettetken. Advokattardyń aitýynsha, sýdia sottalýshylardyń biri – akýsher-ginekolog Asqar Qaiyrjannyń ótinishi negizinde prokýrorǵa qarsylyq bildirgen.
Endi uzaqqa sozylǵan osy sot otyrysynda sottalýshy Nysanbaevqa qatysty 367-baptyń 2-tarmaǵy ("Aitarlyqtai mólsherde para berý") boiynsha aiyptaý epizodyn qaraý qaldy. Taraptardyń jaryssózi 24-26 qarashaǵa josparlanǵan.
