Reseilik oppozitsiialyq saiasatker Aleksei Navalnyi shtabynyń úilestirýshileri Novosibirski men Tomsk qalalarynda 13 qyrkúiek kúni ótken aimaqtyq sailaýdyń aldyn ala qorytyndysy boiynsha jeńiske jetken. Navalnyi ýlanbai turyp osy qalalarda bolǵan edi.
Navalnyi shtabynyń Tomsk oblysy boiynsha úilestirýshisi Kseniia Fadeeva Tomsk qalalyq dýmasynyń sailaýynda jeńdi. Bul týraly sailaý okrýginiń aldyn ala qorytyndysyna súiengen Fadeeva men jaqtastary habarlady. Fadeeva 9 sailaý ýchaskesiniń jeteýinde "Edinaia Rossiia" kandidatyn jeńgen.
Jemqorlyqpen kúres qorynyń direktory Ivan Jdanovtyń aitýynsha, Fadeeva – Reseidegi sailaýda alǵash jeńgen Navalnyi shtabynyń úilestirýshisi. Ol áleýmettik jelide "Navalnyiǵa Tomskide ý bergen. Bul shtabtyń soǵan qaitarǵan myqty jaýaby boldy" dep jazdy.
Navalnyi aimaqtyq shtabynyń jetekshisi Sergei Boiko da sailaýda jeńgen. Boikonyń Novosibirsk qalalyq keńesine depýtat bolyp sailanǵany habarlandy.
Reseilik oppozitsioner, Jemqorlyqpen kúres qorynyń jetekshisi 44 jastaǵy Aleksei Navalnyi 20 tamyz kúni Tomskiden Máskeýge baǵyt alǵan ushaqta jaǵdaiy kúrt nasharlaǵan. Ol Novosibirsk men Tomskige jergilikti biliktiń áreketi týraly zertteý jasaý úshin kelgen. Bul zertteý keiinnen Jemqorlyqpen kúres qorynyń saitynda jariialandy. Navalnyi Omby aýrýhanasyna jatqyzylyp, eki kúnnen soń Berlinge emdeýge jiberildi. Nemis mamandary onyń "Novichok" tobyna jatatyn zattan ýlanǵanyn anyqtady.
13 qyrkúiekte Reseidiń 41 aimaǵynda túrli deńgeidegi sailaý ótken. Navalnyi jaqtastaryn "aqyldy daýys berý" qosymshasy arqyly sailaýǵa qatysýǵa shaqyrǵan.
