«Aýyl» partiiasy tóraǵasynyń birinshi orynbasary Tóleýtai Rahymbekov otandyq agrarlyq ǵylymnyń negizgi problemasy týrasynda pikir bildirdi, dep habarlaidy QazAqparat.
«Biz saladaǵy jaǵdaiǵa uzaq taldaý jasap, agrarlyq turǵyda úzdik sanalatyn Argentina, Braziliia, Frantsiia, Germaniia elderimen salystyrý jumystaryn júrgizdik. Osy oraida Qazaqstannyń agrarlyq ǵylymynyń basty problemasy bilimdi jetkizý, tehnologiia transferti men kommertsiialandyrýda uiymdastyrý sharalarynyń jetkiliksizdigine bailanysty degen uiǵarymǵa keldik», - dedi T. Rahymbekov AÓK salasynda ǵylymi jetistikterdi kommertsiialandyrý taqyrybyndaǵy onlain konferentsiiada.
Osy oraida ol elimizde keibir protsester kerisinshe júrgizilip jatqanyn atap ótti.
«Bizde 23 ǵylymi-zertteý institýty, 14 tájiribelik stantsiia bar. Argentinada 4 ǵylymi-zertteý institýty, 4 ǵylymi-tájiribelik stansa men 320 bilimdi taratý ortalyǵy jasaqtalǵan. Bizdiń baǵalaý boiynsha Qazaqstanda bilimdi jetkizip, taratatyn kem degende 200-210 ortalyq kerek. Bul degenimiz, 163-i aýyldyq aýdan, 40-y oblys deńgeiinde, sondai-aq qosymsha úsheýi negizgi ortalyq dárejesinde 3 ýniversitettiń bazasynda», - dedi T. Rahymbekov.
Budan buryn habarlanǵandai, Tóleýtai Rahymbekov agrarlyq salada ǵalymdar óziniń ǵylymi jumystaryna syiaqy alýy kerektigin atap ótti.
«Kommertsiialandyrý – bul termin qazirgi kezde bizdiń qoǵamdyq ómirimizde óziniń naqty ornyn alyp otyr. Kommertsiialandyrýdyń qajet ekenine daý joq, alaida sózden iske kóshý úshin biraz sharýany eńserý kerek. Kommertsiialandyrýdyń ishindegi eń basty tetikteriniń biri – ol «roialti júiesi», - dedi ol.
