Foto: Pexels.com
Tólegen muǵalim kósheniń arǵy basynan bergi basyndaǵy mektep internatyna kúnine birneshe ret keledi-aý. Júrisi bólek. Ol kisiniń jailap júrgenin elestete almaimyn.
Mektep bitirip, oqýǵa túse almadym. Kelesi jyly Almatyǵa bara almaitynymdy bilip, áiteýir bir oqýǵa tapsyrarmyn dep júrgenimde, qolynda gazeti bar Tólegen muǵalim kelip, Oralda jańa oqý ornynyń rejissýra fakýlteti ashylyp jatqanynan habar berdi. Men oilanbastan jol tarttym. Diplomymdy qolyma alyp kelgenimde, eń alǵash quttyqtap Baqshaý apaiym jetti úige.
Shabyt festivalinen júldeli bolyp kelgen kezim. Teatrǵa izdep keldi muǵalim:
- Birinshiden, qutty bolsyn. Ekinshiden bul júldeńdi (tós belgini) maǵan mýzeige tapsyr. Bul júldelerińniń basy ǵana. Erteń budan da myqtylardy qanjyǵańa bailaǵanda bul tós belgini taqpaisyń da. Al murajaida buny el kórip, tilekshiń bolyp otyrady, - dedi.
Muǵalimge "joq" dei almaityn balalyǵymyz boiymyzda qalǵan meniń (áli qyzyǵy basylmaǵan) tósbelgini usyna salýdan basqa amalym bolǵan joq. Qazir sol murajaida maǵan arnalǵan buryshtyń eń alǵashqy jádigeri bolyp turǵanyna 22 jyl bolypty. Qairan meniń muǵalimim, birneshe jyldardan keiin prezidenttiń qolynan joǵarǵy nagrada alatynymdy bilgen de, sengen de siz ǵanasyz-aý.
Muǵalim kelesi bir kelgeninde:
- Maǵan eń alǵashqy qoiylymyńda kigen kastiýmiń kerek. Mýzeige, - dedi.
- Muǵalim, meniń ony ala alatyn bedelim bes bolyp turǵan joq qoi. Ony qalai alamyn teatrdan?
- Ony bilmeimin. Erteń soǵam. Daiyn tursyn. Bar jumysym sol, - dedi de jóneldi.
Qudai ońdap kostiýmer Roza apam jaǵdaidy túsinip: "Bul jaqsy ǵoi, qyzym. Sen myqty qyz bolyp tursyń artyńnan mekteptegi muǵalimiń izdep júrse. Al ana alǵashqy kigen kastiýmińdi. Berdim saǵan", - dedi.
Sol kelgeninde muǵalim:
- Sen aýyl jaqqa kóp alańdama. Sen ana Maýletke (kenje inim) muqiiat bol. Sony oqyt. Sol balany óziń qadaǵala. Al aýyldaǵy shesheńniń jaǵdaiyn ýaiymdama. Ótkende terezesin salyp berdim. Áinegi synyp ketken eken (áinek tabý degen ol zamanda eń qiynnyń qiyny) Qysta kómirin ózim taýyp berem. Oǵan alań bolma, - dep ketti.
Qarap otyrsam, muǵalim men oqyǵan klasqa sabaq bermedi. Biraq, meniń taǵdyrymdy, óner jolyndaǵy ár qadamymdy kózinen tasa qylmady. Tilekshi boldy. Aýylǵa bir barǵanymda ózi júgirip júrip, klýbqa eldi jinap menimen kezdesý uiymdastyrdy. Ol kezde áli jas, eshteńege qol jetkizbegen ýaqytym ǵoi. Sol kezdiń ózinde úlken úmit artyp, aýyldan shyqqan bir búldirshinge sondai yqylas aýdarýy qanshama jaýapkershilikti tabystaǵany eken ǵoi. Mektepten kettiń, boldy, endigi taǵdyryń óz qolyńda demedi.
Tólegen muǵalim aýyryp qalypty degendi estip, bolnitsaǵa bardym. Baqshaý apaiym qasynda otyr eken.
- Siz bizge kereksiz, muǵalim. Barlyǵy úshin alǵysymdy aityp bolǵan joqpyn sizge, - dep aita aldym-aý...
Bul tek bir meniń ǵana esteligim. Muǵalimniń qansha balanyń qamqorshysy men jol kórsetýshisi bolǵanyn el biledi. Aýylymdaǵy eń kórikti mekeme Tólegen muǵalimniń tirnektep jinaǵan mýzeii, qazir eldiń igiligine jumys jasaýda. O basta ómirge kelgen missiiasyn tolyqtai adal jolmen júrip, adal atqarǵan jan bolsa, ol meniń Tólegen muǵalimim!
Sizdiń artyńyzdan ergen tuiaǵyńyz Jaisań muǵalim de dál sol siz júrgen jolmen keledi, ustaz. Mýzeiińiz jarqyrap tur. Siz eldiń perzenti bola bildińiz.
Avtor: Nurgúl Jubatova
