فوتو: Pexels.com
تٶلەگەن مۇعالٸم كٶشەنٸڭ ارعى باسىنان بەرگٸ باسىنداعى مەكتەپ ينتەرناتىنا كٷنٸنە بٸرنەشە رەت كەلەدٸ-اۋ. جٷرٸسٸ بٶلەك. ول كٸسٸنٸڭ جايلاپ جٷرگەنٸن ەلەستەتە المايمىن.
مەكتەپ بٸتٸرٸپ, وقۋعا تٷسە المادىم. كەلەسٸ جىلى الماتىعا بارا المايتىنىمدى بٸلٸپ, ەيتەۋٸر بٸر وقۋعا تاپسىرارمىن دەپ جٷرگەنٸمدە, قولىندا گازەتٸ بار تٶلەگەن مۇعالٸم كەلٸپ, ورالدا جاڭا وقۋ ورنىنىڭ رەجيسسۋرا فاكۋلتەتٸ اشىلىپ جاتقانىنان حابار بەردٸ. مەن ويلانباستان جول تارتتىم. ديپلومىمدى قولىما الىپ كەلگەنٸمدە, ەڭ العاش قۇتتىقتاپ باقشاۋ اپايىم جەتتٸ ٷيگە.
شابىت فەستيۆالٸنەن جٷلدەلٸ بولىپ كەلگەن كەزٸم. تەاترعا ٸزدەپ كەلدٸ مۇعالٸم:
- بٸرٸنشٸدەن, قۇتتى بولسىن. ەكٸنشٸدەن بۇل جٷلدەڭدٸ (تٶس بەلگٸنٸ) ماعان مۋزەيگە تاپسىر. بۇل جٷلدەلەرٸڭنٸڭ باسى عانا. ەرتەڭ بۇدان دا مىقتىلاردى قانجىعاڭا بايلاعاندا بۇل تٶس بەلگٸنٸ تاقپايسىڭ دا. ال مۇراجايدا بۇنى ەل كٶرٸپ, تٸلەكشٸڭ بولىپ وتىرادى, - دەدٸ.
مۇعالٸمگە "جوق" دەي المايتىن بالالىعىمىز بويىمىزدا قالعان مەنٸڭ (ەلٸ قىزىعى باسىلماعان) تٶسبەلگٸنٸ ۇسىنا سالۋدان باسقا امالىم بولعان جوق. قازٸر سول مۇراجايدا ماعان ارنالعان بۇرىشتىڭ ەڭ العاشقى جەدٸگەرٸ بولىپ تۇرعانىنا 22 جىل بولىپتى. قايران مەنٸڭ مۇعالٸمٸم, بٸرنەشە جىلداردان كەيٸن پرەزيدەنتتٸڭ قولىنان جوعارعى ناگرادا الاتىنىمدى بٸلگەن دە, سەنگەن دە سٸز عاناسىز-اۋ.
مۇعالٸم كەلەسٸ بٸر كەلگەنٸندە:
- ماعان ەڭ العاشقى قويىلىمىڭدا كيگەن كاستيۋمٸڭ كەرەك. مۋزەيگە, - دەدٸ.
- مۇعالٸم, مەنٸڭ ونى الا الاتىن بەدەلٸم بەس بولىپ تۇرعان جوق قوي. ونى قالاي الامىن تەاتردان?
- ونى بٸلمەيمٸن. ەرتەڭ سوعام. دايىن تۇرسىن. بار جۇمىسىم سول, - دەدٸ دە جٶنەلدٸ.
قۇداي وڭداپ كوستيۋمەر روزا اپام جاعدايدى تٷسٸنٸپ: "بۇل جاقسى عوي, قىزىم. سەن مىقتى قىز بولىپ تۇرسىڭ ارتىڭنان مەكتەپتەگٸ مۇعالٸمٸڭ ٸزدەپ جٷرسە. ال انا العاشقى كيگەن كاستيۋمٸڭدٸ. بەردٸم ساعان", - دەدٸ.
سول كەلگەنٸندە مۇعالٸم:
- سەن اۋىل جاققا كٶپ الاڭداما. سەن انا ماۋلەتكە (كەنجە ٸنٸم) مۇقييات بول. سونى وقىت. سول بالانى ٶزٸڭ قاداعالا. ال اۋىلداعى شەشەڭنٸڭ جاعدايىن ۋايىمداما. ٶتكەندە تەرەزەسٸن سالىپ بەردٸم. ەينەگٸ سىنىپ كەتكەن ەكەن (ەينەك تابۋ دەگەن ول زاماندا ەڭ قيىننىڭ قيىنى) قىستا كٶمٸرٸن ٶزٸم تاۋىپ بەرەم. وعان الاڭ بولما, - دەپ كەتتٸ.
قاراپ وتىرسام, مۇعالٸم مەن وقىعان كلاسقا ساباق بەرمەدٸ. بٸراق, مەنٸڭ تاعدىرىمدى, ٶنەر جولىنداعى ەر قادامىمدى كٶزٸنەن تاسا قىلمادى. تٸلەكشٸ بولدى. اۋىلعا بٸر بارعانىمدا ٶزٸ جٷگٸرٸپ جٷرٸپ, كلۋبقا ەلدٸ جيناپ مەنٸمەن كەزدەسۋ ۇيىمداستىردى. ول كەزدە ەلٸ جاس, ەشتەڭەگە قول جەتكٸزبەگەن ۋاقىتىم عوي. سول كەزدٸڭ ٶزٸندە ٷلكەن ٷمٸت ارتىپ, اۋىلدان شىققان بٸر بٷلدٸرشٸنگە سونداي ىقىلاس اۋدارۋى قانشاما جاۋاپكەرشٸلٸكتٸ تابىستاعانى ەكەن عوي. مەكتەپتەن كەتتٸڭ, بولدى, ەندٸگٸ تاعدىرىڭ ٶز قولىڭدا دەمەدٸ.
تٶلەگەن مۇعالٸم اۋىرىپ قالىپتى دەگەندٸ ەستٸپ, بولنيتساعا باردىم. باقشاۋ اپايىم قاسىندا وتىر ەكەن.
- سٸز بٸزگە كەرەكسٸز, مۇعالٸم. بارلىعى ٷشٸن العىسىمدى ايتىپ بولعان جوقپىن سٸزگە, - دەپ ايتا الدىم-اۋ...
بۇل تەك بٸر مەنٸڭ عانا ەستەلٸگٸم. مۇعالٸمنٸڭ قانشا بالانىڭ قامقورشىسى مەن جول كٶرسەتۋشٸسٸ بولعانىن ەل بٸلەدٸ. اۋىلىمداعى ەڭ كٶرٸكتٸ مەكەمە تٶلەگەن مۇعالٸمنٸڭ تٸرنەكتەپ جيناعان مۋزەيٸ, قازٸر ەلدٸڭ يگٸلٸگٸنە جۇمىس جاساۋدا. و باستا ٶمٸرگە كەلگەن ميسسيياسىن تولىقتاي ادال جولمەن جٷرٸپ, ادال اتقارعان جان بولسا, ول مەنٸڭ تٶلەگەن مۇعالٸمٸم!
سٸزدٸڭ ارتىڭىزدان ەرگەن تۇياعىڭىز جايساڭ مۇعالٸم دە دەل سول سٸز جٷرگەن جولمەن كەلەدٸ, ۇستاز. مۋزەيٸڭٸز جارقىراپ تۇر. سٸز ەلدٸڭ پەرزەنتٸ بولا بٸلدٸڭٸز.
اۆتور: نۇرگٷل جۇباتوۆا
