Tokio Olimpiadasyn uiymdastyrý komitetiniń basshysy Iosiro Mori genderlik málimdemelerine qatysty janjalǵa bailanysty jumystan ketetinin málimdedi, dep habarlaidy Kyodo News agenttigi.
«Búgingi kúnnen bastap otstavkaǵa ketemin. Men orynsyz málimdemeler jasap, qolaisyz jaǵdai týdyrdym. Olimpiadaǵa daiyndyqqa kedergi bolmaýym kerek edi», - dedi ol «Tokio-2020» uiymdastyrý komiteti Atqarýshy keńesiniń otyrysynda.
Iosiro Moridiń ornyn Japoniiadaǵy Olimpiada isteri boiynsha ministr Seiko Hashimoto basýy múmkin.
83 jastaǵy Mori Japoniiadaǵy Olimpiadany uiymdastyrý komitetin 2014 jyldan beri basqarady.
Moridiń otstavkaǵa ketetini týraly 3 aqpan kúni aityla bastady. Ol 2020 jylǵy Olimpiada oiyndarynyń uiymdastyrý komitetiniń otyrysynda sport komitetteri men federatsiialarda áiel sanynyń kóbeiýi jinalystardyń uzaqqa sozylatynyna ákep soǵatynyn málim etken edi.
Tokio Olimpiadasy 2020 jyldyń 24 shildesi men 9 tamyzy aralyǵynda ótýi kerek bolatyn, biraq koronavirýs pandemiiasyna bailanysty jarys bir jylǵa shegerildi. Endi oiyndar 2021 jyldyń 23 shildesi men 8 tamyzy aralyǵyna josparlanyp otyr. Bul jarystardyń ataýyn «Tokio-2020» dep qaldyrdy. Al Paralimpiada oiyndary 24 tamyz ben 5 qyrkúiek aralyǵynda ótedi.
