Prezident Qasym-Jomart Toqaevtyń tóraǵalyǵymen TMD-ǵa múshe memleketter basshylary keńesiniń shaǵyn quramdaǵy otyrysy ótti, dep habarlaidy "Ult aqparat" Aqordaǵa silteme jasap.
Qasym-Jomart Toqaev TMD-ǵa múshe memleketter basshylary keńesiniń otyrysyna qatysý úshin kelgen delegatsiia jetekshilerine rizashylyǵyn bildirdi.
– Eń aldymen, Qazaqstannyń TMD uiymyna tóraǵalyǵy aiasyndaǵy bastamalaryna qoldaý bildirip, osy kúnderi Astanada ótip jatqan halyqaralyq is-sharalarǵa belsendi qatysqandaryńyz úshin alǵys aitamyn. Búgingi otyrysqa Keńes múshesi retinde Túrikmenstan Prezidenti, qurmetti Serdar Gýrbangýlyuly Berdimuhamedov alǵash ret qatysyp otyr. Osy jerdegi áriptesterdiń jáne ózimniń atymnan Sizge qosh keldińiz dei otyryp, jaýapty memlekettik qyzmetińizge tabys tileimin. Táýelsiz Memleketter Dostastyǵyna qatysýshy memleketter basshylary keńesiniń kezekti otyrysyn ashyq dep jariialaimyn. Búgin Memleketter basshylary keńesiniń qaraýyna gýmanitarlyq seriktestikke, qaýipsizdikke jáne yntymaqtastyǵymyzdyń basqa da aspektilerine qatysty mańyzdy máseleler usynylyp otyr, – dedi Memleket basshysy.
Prezident Dostastyqqa múshe elderdiń basshylaryn Qazaqstan byltyr seriktestermen jáne TMD Atqarýshy komitetimen birge atqarǵan kópjosparly jumystyń negizgi qorytyndylary týraly habardar etti. Memleket basshysynyń aitýynsha, Qazaqstan óz tóraǵalyǵynyń basymdyqtaryna sáikes, qazirgi álemdik damý protsesterin eskere otyryp, múshe memleketterdiń kúsh-jigerin kóptegen baǵyttar boiynsha biriktirýge umtyldy.
– Birlesken jumystyń nátijesinde saýda-ekonomikalyq yntymaqtastyqty keńeitýge, tyǵyz mádeni-gýmanitarlyq bailanystarymyzdy saqtaýǵa, sondai-aq Dostastyqtyń áleýeti men halyqaralyq bedelin arttyrýǵa baǵyttalǵan birqatar mańyzdy bastamalar iske asyryldy. Kúrdeli ekonomikalyq jaǵdaida Dostastyqtyń ekonomikalyq áleýetin nyǵaitýǵa jáne TMD-nyń 2030 jylǵa deiingi Ekonomikalyq damý strategiiasynyń erejelerin oryndaýǵa erekshe nazar aýdaryldy. Is-sharalar josparynyń birinshi kezeńin tabysty júzege asyrý iskerlik belsendilikti arttyrýǵa, ózara saýda kólemin ulǵaitýǵa, ekonomikany pandemiiadan keiin qalpyna keltirý isin jedeldetýge múmkindik berdi. Jahandyq jáne óńirlik ekonomikanyń turaqsyzdyǵy jaǵdaiynda biz tyǵyz saýda-ekonomikalyq bailanystardy saqtaý úshin qolda bar barlyq áleýetti jumyldyrýymyz qajet, – dedi Qasym-Jomart Toqaev.
Prezidenttiń pikirinshe, klimat máselesi ózekti bolyp otyr. Memleket basshysy klimattyń ózgerýi TMD-nyń barlyq derlik elderinde sý resýrstarymen qamtamasyz etý problemasyn shielenistire túsetinin atap ótti.
– Biz bul máselemen túrli halyqaralyq format aiasynda ainalysyp, ekijaqty negizde ózara tiimdi sheshimderdi qarastyramyz. Sonymen birge Dostastyqtyń búkil keńistiginde sý qaýipsizdigin qamtamasyz etýdiń ortaq ádisterin ázirleitin ýaqyt keldi. TMD Atqarýshy komitetine transshekaralyq sý resýrstaryn ózara tiimdi paidalaný jóninde naqty usynymdar berýdi usynamyn, – dedi Qasym-Jomart Toqaev.
Otyrys barysynda sondai-aq Ázerbaijan Prezidenti Ilham Áliev, Armeniia Premer-ministri Nikol Pashinian, Belarýs Prezidenti Aleksandr Lýkashenko, Qyrǵyzstan Prezidenti Sadyr Japarov, Resei Prezidenti Vladimir Pýtin, Tájikstan Prezidenti Emomoli Rahmon, Túrikmenstan Prezidenti Serdar Berdimuhamedov jáne Ózbekstan Prezidenti Shavkat Mirziioev sóz sóiledi.
