Kollaj: ulysmedia.kz.
Májilis depýtaty Edil Jańbyrshin «prezident bolatyn adam ózin balabaqshadan bastap daiyndaý kerektigin» aitty, dep habarlaidy Ulysmedia.kz.
«Qazirge deiin prezidenttikke úmitker retinde tirkelgen adamdardyń janynda Qasym-Jomart Toqaev shappai báige alatyn jaǵdaida ǵoi. Shyny kerek, shynaiy básekeles bola alatyn adamdardy prezidenttikke úmitker retinde tirkeý kerek dep oilamaisyz ba?» - dep surady tilshi depýtattan.
Bul suraqqa jaýap bergen Jańbyrshin bir mysal keltirdi.
«Keshe «Uly dala joryǵyna» 20-ǵa tarta at qatysty. Ol jerge myqty-myqty attar keldi. Solar alady dep oilady. Ainalyp kelgende qýańshylyqtan ótip kelgen, Mańǵystaýdan ákelingen, aryp-ashyp kelgen attar jeńip shyqty. Sailaý degen sondai. Ártúrli jaǵdailar bolýy múmkin. Sondyqtan Qasym-Jomart Toqaevtyń qasyndaǵy kandidattar álsiz, olarǵa shappai báige berý kerek degenmen men kelispeimin», - dedi depýtat.
Ol «buryn túspegen jańa adamdar sailaýǵa túsip jatqanyn» aityp ótti. Jýrnalistiń «siz, Jigýli myrza, prezident bolyp ketýi múmkin dep oilaisyz ba?» degen suraǵyna Jańbyrshin «bári múmkin» dep jaýap berdi.
«Biraq endi yqtimaldyq degen bar. Yqtimaldyq óte tómen bolyp tur degenmen kelisem. Qansha degenmen, qazirgi prezidenttiń bedeli de, tájiribesi de mol. Bárin sailaýshylar sheshedi. Prezident bolatyn adam ózin kishkentai kezinen daiyndaý kerek», - dedi halyq qalaýlysy.
Jańbyrshin Olimpiada chempiony bolýy úshin sportshy onyń aldynda ǵana kúrespeitinin mysalǵa keltirdi. Sol sebepti onyń paiymdaýynsha, prezident bolatyn adamnyń tájiribesi, bilim-biligi bolýy kerek.
Aita ketsek, «Amanat» partiiasynyń kezekten tys HHIV sezinde aldaǵy kezekten tys prezident sailaýyna partiia atynan kandidat usyný máselesi qaraldy. Sezde «Amanat» partiiasynyń tóraǵasy Erlan Qoshanov prezidenttikke úmitker retinde Qasym-Jomart Toqaevty usynatynyn málim etti.
