Memleket basshysy Parlament Senatynyń Tóraǵasy Máýlen Áshimbaevty qabyldady, dep habarlaidy "Ult aqparat" Aqordanyń baspasóz qyzmetine silteme jasap.
Kezdesýde el Prezidentiniń tapsyrmalaryn zańnamalyq turǵydan qamtamasyz etý máseleleri qarastyryldy. Senat Tóraǵasy Memleket basshysy Qasym-Jomart Toqaevqa qabyldanǵan birqatar zańdar jóninde, sonyń ishinde, respýblikalyq biýdjet týraly zańǵa engizilgen ózgertýler men tolyqtyrýlar, sailaý týraly zańǵa engizilgen túzetýler týraly aitty. Memleket basshysy atalǵan zańdarǵa qol qoidy.
Joǵarǵy palata kvazimemlekettik sektordaǵy satyp alýlardy retteitin zań qabyldady. Qazirgi ýaqytta áleýmettik kásipkerlikti damytý, Salyq kodeksine ózgertýler men tolyqtyrýlar engizý jáne basqa da zań jobalary depýtattardyń qaraýynda jatyr.
Máýlen Áshimbaevtyń málimeti boiynsha osy sessiia bastalǵaly beri senatorlar 12 zań jobasyna bastamashy boldy. Onyń 3-in Parlament qabyldasa, 4-ýi Senat pen Májilistiń qaraýynda. Taǵy 5 zań jobasy depýtattardyń bastamasymen ázirlenip jatyr.
Senat Tóraǵasy Prezidentke parlamentaralyq yntymaqtastyqty damytý, Resei, Ózbekstan jáne basqa da elderdiń zań shyǵarýshy organdarymen bailanystardy nyǵaitý jóninde aitty.
Sonymen qatar Máýlen Áshimbaev Memleket basshysynyń tapsyrmasy boiynsha ázirlengen «Asharshylyq. Golod. 1928-1934. Derekti hronika» jinaǵyn usyndy. Atalǵan úsh tomdyqta Qazaqstandaǵy kúshtep ujymdastyrýdyń qasiretti tarihyn baiandaityn myńnan astam arhiv qujattary jinaqtalǵan.
