Qazaqstan azamattaryn Siriiadan qaitarý boiynsha «Jýsan» arnaiy gýmanitarlyq aktsiiasynyń sońǵy kezeńi aiaqtaldy. Osyǵan orai Aqordanyń baspasóz qyzmeti QR Prezidenti Qasym-Jomart Toqaevtyń málimdemesin taratty, dep habarlaidy "Ult aqparat".
"Meniń tapsyrmam boiynsha 28-31 mamyrda «Jýsan» arnaiy gýmanitarlyq aktsiiasynyń sońǵy kezeńi tabysty ótti. Siriiadan otandastarymyzdyń kezekti toby oraldy. Qazaqstannyń memlekettik qurylymdarynyń júieli jumystarynyń jáne sheteldik seriktestermen tyǵyz yqpaldastyqtyń arqasynda qaqtyǵys aimaǵynan 171 bala shyǵaryldy. Qazaqstanǵa oralǵan soń, olar ońaltý sharalarynan ótip, barlyq qajetti kómek alatyn arnaiy beiimdeý ortalyǵyna ornalastyryldy.
«Jýsan» gýmanitarlyq operatsiiasy – aýqymdy aktsiia. Bul bastamany Tuńǵysh Prezident – Elbasy Nursultan Nazarbaev usyndy jáne byltyrdan beri júzege asyrylýda. Keshendi sharalar nátijesinde qaqtyǵys aimaǵynan Otanymyzǵa 357 bala qaitaryldy. Balalardyń qaýipsizdigin qamtamasyz etý «Jýsan» operatsiiasynyń basty maqsaty boldy.
«Jýsan» gýmanitarlyq operatsiiasynyń qorytyndylary memleketimizdiń óte kúrdeli mindetterdi tiimdi sheshýge qabiletti ekenin kórsetti.
Osy operatsiiaǵa qatysqan arnaiy qyzmet ókilderiniń, diplomattardyń, áskerilerdiń bárine tapsyrylǵan jaýapty missiiany abyroimen oryndaǵany úshin alǵys bildiremin.
Elge oralǵan otandastar jańa ómir bastaýǵa, al balalar beibit ómir súrýge múmkindik aldy.
Biz óz azamattarymyzdyń quqyqtary men qaýipsizdigin aldaǵy ýaqytta da qorǵaityn bolamyz", - delingen málimdemede.
Eske salaiyq, Siriiadan qazaqstandyqtardyń alǵashqy legi biylǵy 6 qańtarda elge jetkizilgen bolatyn. Quqyqqorǵaý organdary men Syrtqy ister ministrligi júrgizgen gýmanitarlyq shara nátijesinde 47 azamat, sonyń ishinde 30 bala Qazaqstanǵa qaitaryldy.
7-9 mamyr kúnderi atalmysh elden Qazaqstannyń taǵy 231 azamaty oraldy. Onyń 156-sy - balalar, deni mektep jasyna deiingiler, sonyń ishinde 18-i - jetim balalar.
«Jýsan-2» operatsiiasyna qatysty ótken baspasóz máslihatynda QR Syrtqy ister ministriniń orynbasary Erjan Ashyqbaev atap ótkendei, Siriiadan qaitarylǵan adamdardyń lańkestik qylmystarǵa qatysy barlary jazaǵa tartylatyn bolady.
«Lańkestik is-qimyldarǵa jáne zańsyz jaýyngerlik áreketterge qatysqandarǵa toqtalsaq, qylmystarǵa qatystylyǵy dáleldengen jaǵdaida, olar QR zańnamasyna sáikes qylmystyq jaýapkershilikke tartylady. Bul gýmanitarlyq operatsiia AQSh-tyń qoldaýymen júzege asyryldy, sondai-aq bul jobada Siriia demokratiialyq kúshteriniń mańyzdy rólin atap ótken jón», - degen edi ministrdiń orynbasary.
Otanyna qaitarylǵan azamattardyń deni jeke qujattaryn joǵaltyp alǵan.
Endigide deradikalizatsiialaý jáne saýyqtyrý máselelerine erekshe kóńil bóline otyryp, qaityp kelgen áielder men balalardy beiimdeý ári qaita áleýmettendirý júrgiziledi.
Elimizde resmi saparmen bolǵan BUU-nyń Adam quqyqtaryn jáne irgeli bostandyqtaryn ilgeriletý men qorǵaý jónindegi arnaiy baiandamashysy Fionnýala Ni Aolein Qazaqstannyń Siriia men Iraktaǵy janjal aimaǵynan óz azamattaryn qaitarý bastamasyn ózge memleketterge úlgi etti.
