Qasym-Jomart Toqaev Atyraý oblysynyń jurtshylyǵymen kezdesý barysynda óńirdegi jemqorlyqpen kúres týraly aitty, dep habarlaidy "Ult aqparat" Prezidenttiń baspasóz hatshysy Berik Ýálige silteme jasap.
«Oblysta jemqorlyqqa qarsy kúres saiasatyn kúsheitý kerek. Jemqorlyqty joiý barlyq deńgeidegi ákimder jumysynyń negizgi kórsetkishi bolady. Ákimderge jeke jaýapkershilik júkteledi», - dedi Memleket basshysy.
Prezident el ekonomikasynyń damýy men halyqtyń ál-aýqatynyń artýy jemqorlyqpen kúrestiń naqty nátijelerine tikelei bailanysty ekenin atady.
«Bul qoǵamdyq kesel ulttyq qaýipsizdikke qater tóndiredi. Alaida bul maqsatqa jetý úshin tek jazalaý sharalary jetkiliksiz. Muny álemdik tájiribe dáleldedi. Sondyqtan qoǵamdyq baqylaýdy kúsheitý qajet. Azamattar qoǵamdyq ómirge belsene aralasýy kerek», - degen Memleket basshysy.
Sondai-aq, Qasym-Jomart Toqaev Atyraý oblysyndaǵy joldardyń sapasyn synǵa aldy.
«Oblysta 2 myń shaqyrymnan astam avtokólik joly bar. Biraq, onyń teń jartysyna jýyǵy nashar. Qalǵan 217 shaqyrym joldy jóndeý jumysyn 2021 jyldan keshiktirmei qolǵa alýdy tapsyramyn. Atalǵan jobaǵa qosymsha 65 mlrd teńge bólinedi», - dedi Qasym-Jomart Toqaev.
Sonymen qatar Memleket basshysy óńirdegi gidrotehnikalyq nysandardyń eskiligine de toqtaldy.
Halyqty taza aýyz sýmen qamtamasyz etýdi aitpai ketýge bolmaidy. Gidrotehnikalyq nysandar uzaq ýaqyt boiy jóndeý kórmegen, jańǵyrtylmaǵan. Ózdiginen sý shyǵaryp jatqan 120 uńǵyma óńirdiń sý qoryna aitarlyqtai nuqsan keltirýde. Olar joiylýy tiis!», - dedi ol.
Eske sala ketsek, keshe Qasym-Jomart Toqaev Atyraý oblysyna jumys saparymen kelgendigi týraly habarlaǵan bolatynbyz.
