Jastardyń otanshyldyq rýhy jalań uranshyldyq pen joǵary mansapqa emes, eń aldymen tereń bilimge negizdelýi tiis. Búgin Jastar jylyn ótkizýdegi maqsat pen mindetterge arnalǵan dóńgelek ústel otyrysynda Parlament Senatynyń tóraǵasy Qasym-Jomart Toqaev osylai málim etti, dep habarlaidy QazAqparat.
«Qazir álem kún sanap qubylý ústinde. Jahan damýynyń keibir tustary adamzat úshin únemi tiimdi bola bermeitini daýsyz. Halyqaralyq ahýal shielenisken kezeńde bizdiń memleketimizdiń qaýipsizdigine tónetin syn-qaterler de arta túsedi. Osyndai asa kúrdeli álemdik ahýalda eldigimizdi saqtap qalý men tabysty damýdyń birden-bir joly, shyn máninde ult bolyp uiysa otyryp, áreket etý ekenin túsinýimiz qajet. Bir sózben aitqanda, Qazaqstan halqynyń jarqyn bolashaǵyn qamtamasyz etý tikelei ózimizdiń is-áreketimizge bailanysty. Memlekettiń damýy, onyń qaýipsizdigin qamtamasyz etý jáne ultymyzdyń órkendeýi bizdiń ózimizden basqa eshkimge qajet emes ekeni anyq. Sondyqtan biz jastardy otansúigishtik rýhta tárbieleýdiń asa mańyzdy mindet ekeni týraly sóz qozǵap otyrmyz. Alaida, jastardyń otanshyldyq rýhy jalań uranshyldyq pen joǵary mansapqa emes, eń aldymen, tereń bilimge negizdelýi tiis», - dedi Senat tóraǵasy.
Osy oraida ol keleshek - shynaiy bilimmen qarýlanǵandardyń qolynda ekenin atap ótti. Innovatsiialyq tabysqa qol jetkizgen jáne sol jetistikterdi óz halqynyń igiligi úshin paidalana bilgen memleketter ǵana kósh aldynda bolary anyq.
«Bul oraida, damyǵan elder jasandy intellekt pen ózge de mańyzdy ǵylymi zertteýlerge aitarlyqtai qarajat bólip otyrǵany kezdeisoq jaǵdai emes. Basqasha aitqanda, álem qaýymdastyǵy aiqyn qarama-qaishylyqtardyń aldynda tur. Ǵylym men jańa tehnologiialarǵa den qoiǵan memleketterdiń joly dańǵyl bolary sózsiz. Qalǵandary kúnkóristiń qamyn kúittep, joly bolyp jatsa daiyn ǵylymi ónimdi tutynýshylardyń qataryna qosylady.
Sondyqtan álemdik damýda oryn alyp otyrǵan boljamdarǵa nemquraily qaramai, tiisti qorytyndy shyǵarýymyz qajet. Bul tusta jastardyń kúsh-jigeri men belsendiliginiń asa mańyzdy ekenin aitý kerek», - dedi Q. Toqaev.
.jpeg)