Foto: Aqorda
Memleket basshysy Qasym-Jomart Toqaev Japoniia Parlamentiniń Qazaqstanmen dostyq ligasynyń tóraǵasy Iasýtoshi Nishimýrany qabyldady, dep habarlaidy Ult.kz.
Kezdesý barysynda Prezident japon saiasatkerin jańa qyzmetimen quttyqtap, ekijaqty yntymaqtastyqtyń qazirgi jaǵdaiy men bolashaǵyn talqylady. Taraptar parlamentaralyq bailanystardy nyǵaitýǵa erekshe nazar aýdardy.
Memleket basshysy Japoniiany Qazaqstannyń Aziiadaǵy negizgi ári senimdi seriktesteriniń biri retinde atap ótti. Onyń aitýynsha, ótken jyly Tokioǵa jasalǵan resmi sapar qorytyndysy qazaq-japon qatynastaryn jańa deńgeige kótergen. Sol sapar aiasynda Sanae Takaichimen birlesken málimdeme qabyldanyp, saýda, ǵylym, bilim, tsifrlandyrý, ekologiia jáne aýyl sharýashylyǵy salalarynda 17 mańyzdy qujatqa qol qoiylǵan.
Sonymen qatar biznes ókilderi jalpy quny 3,7 milliard dollardan asatyn 60-tan astam kelisim jasaǵan. Prezident «Ortalyq Aziia – Japoniia» dialogynyń alǵashqy sammiti tabysty ótkenin aityp, kelesi kezdesý Astanada ótetinin jetkizdi.
Kezdesýde mádeni-gýmanitarlyq bailanystar da sóz boldy. Qasym-Jomart Toqaev Qazaqstanda japon mádenietine, sonyń ishinde sýmo men dziýdoǵa qyzyǵýshylyq artyp kele jatqanyn atap ótti. Sondai-aq qazaqstandyq sýmoshy Kimbozan Harýki (Ersin Baltaǵul) jetistikteri erekshe ataldy.
Óz kezeginde Iasýtoshi Nishimýra Qazaqstanmen kópjaqty yntymaqtastyqty keńeitýge daiyn ekenin bildirip, kezdesý úshin alǵys aitty.
Kezdesý sońynda Memleket basshysy japon saiasatkerin Qazaqstan men Japoniia arasyndaǵy qarym-qatynasty damytýǵa qosqan úlesi úshin I dárejeli «Dostyq» ordenimen marapattady.
