Qazaqstanda munai men gazdyń jańa ken oryndaryn zertteý qajet. Bul jaiynda Qazaqstan Prezidenti Qasym-Jomart Toqaev málim etti, dep habarlaidy "Ult aqparat" Aqordanyń Twitter-degi akkaýntyna silteme jasap.
«Qazir óńirdegi munai-ken oryndarynyń sarqylýy jáne jyl saiyn kómirsýtek óndirýdiń tómendeýi baiqalady. Bolashaqta bul salada jumys isteitin adamdarda problema týyndaýy múmkin. Resýrstyq bazasyn keńeitý boiynsha shuǵyl sharalar qajet», - dedi Qasym-Jomart Toqaev Qyzylorda oblysynyń jurtshylyǵymen kezdesý barysynda.
Osy oraida Memleket basshysy jańa munai-gaz ken oryndaryn zertteýge kirisý qajettigine nazar aýdartty.
«Jańa ken oryndaryn zertteýge, qoldanystaǵy jobalarǵa zamanaýi tehnologiialardy engizýge kirisý qajet. Úkimet «QazMunaiGaz» ulttyq kompaniiasy jáne ákimdikpen birlesip, óńirdegi munai-gaz salasyn damytýdyń naqty strategiiasyn ázirleýi kerek», - dedi Qazaqstan Prezidenti.
Eske salaiyq, búgin Memleket basshysy jumys saparymen Qyzylorda oblysyna keldi. Onda oblystyq kópbeiindi balalar aýrýhanasyna jáne «Jan-Arai» JShS-ǵa bardy. Sondai-aq qalanyń sol jaǵalaýynda paidalanýǵa berilgen nysandarmen tanysty.
.jpeg)