Qasym-Jomart Toqaev XXIV qysqy Olimpiada oiyndarynyń ashylý saltanatyna qatysty, dep habarlaidy "Ult aqparat" Aqordanyń baspasóz qyzmetine silteme jasap.
Memleket basshysy Beijińdegi «Qus uiasy» ulttyq stadionynda ótken XXIV qysqy Olimpiada oiyndarynyń ashylý saltanatyna qatysty.
Saltanatty ashylý rásimine Qazaqstan Prezidenti Qasym-Jomart Toqaev jáne QHR Tóraǵasy Si Tszinpinmen qatar Argentina, Mysyr, Qyrǵyzstan, Polsha, Resei, Singapýr, Serbiia, Tájikstan, Túrikmenstan, Ózbekstan, Ekvador prezidentteri, Qatar Ámiri, Bosniia jáne Gertsegovina, Grekiia, Mońǵoliia jáne Pákistan premer-ministrleri, Kambodja Koroli, Saýd Arabiiasynyń taq murageri, Abý-Dabidiń taq murageri, Monakonyń hanzadasy, Liýksembýrgtyń Uly gertsogy, Tailandtyń hanshaiymy, BUU Bas hatshysy, Halyqaralyq olimpiada komitetiniń Prezidenti, Dúniejúzilik densaýlyq saqtaý uiymynyń Bas direktory, Shanhai yntymaqtyq uiymynyń Bas hatshysy jáne basqa da birqatar sheteldik resmi tulǵa qatysty.
Olimpiadaǵa qatysýshy memleketter sportshylarynyń saltanatty sherýinde Qazaqstannyń Memlekettik týyn short-trekshi Abzal Ájiǵaliev pen konkimen júgirýshi Ekaterina Aidova alyp ótti. Qazaqstannyń ulttyq qurama komandasyna Qasym-Jomart Toqaev qol bulǵap, qoldaý kórsetti.
Qysqy Olimpiadada 87 joldama utyp alǵan ulttyq qurama sapyndaǵy 34 sportshy júldege talasady. Olar shańǵy, fristail, taý shańǵysy, tramplinnen shańǵymen sekirý, shańǵy qossaiysy, biatlon, konkimen júgirý jáne short-trek siiaqty sporttyń segiz túri boiynsha saiysqa túsedi.
16 kúnge sozylatyn Olimpiada oiyndarynda sporttyń 15 túrinen 109 medal sarapqa salynady.
