Memleket basshysy Majarstannyń syrtqy ister jáne syrtqy saýda ministri Peter Siiartony qabyldady, - dep habarlaidy "Ult aqparat" Aqordaǵa silteme jasap.
Kezdesý barysynda Qasym-Jomart Toqaev Qazaqstan men Majarstan arasyndaǵy senimdi saiasi dialogqa, dáiekti ekonomikalyq jáne investitsiialyq yntymaqtastyqqa, COVID-19 pandemiiasynyń syn-qaterleri kezinde ózara qoldaý kórsetýge negizdelgen strategiialyq seriktestiktiń joǵary qarqynyn atap ótti.
Qazaqstan Prezidenti biylǵy 31 naýryzda "Túrkistan - túrki áleminiń rýhani astanasy" taqyrybynda onlain rejimde ótken Túrkitildes memleketterdiń yntymaqtastyq keńesiniń beiresmi sammitine qatysqany úshin Majarstannyń premer-ministri Viktor Orbanǵa rizashylyǵyn jetkizýdi tapsyrdy.
"Júrgizilgen kelissózder Qazaqstan men Majarstan arasyndaǵy qatynastardyń odan ári damýyna tyń serpin beredi dep úmittenemin. Qazaqstan osydan 30 jyl buryn Eýropa elderiniń ishinde birinshi bolyp Majarstanda óz elshiligin ashty. Bizdiń qarym-qatynastarymyz erekshe. Qazaqstandyqtar Majarstandy óte jaqsy biledi. Sizdiń elińizdi jaqyn tartady. Osy múmkindikti paidalana otyryp, Túrkitildes memleketterdiń yntymaqtastyq keńesiniń jumysyna eleýli úles qosqany úshin Premer-Ministr Viktor Orbanǵa rizashylyǵymdy bildiremin", - dedi Memleket basshysy.
Óz kezeginde Peter Siiarto kezdesýge múmkindik týǵyzǵany úshin Qazaqstan Prezidentine alǵys bildirip, óz eliniń basshylyǵynyń sálemin jetkizdi. Osy rette Býdapeshttiń Qazaqstanmen keshendi yqpaldastyǵyn odan ári nyǵaitýǵa, sonyń ishinde, Túrki keńesiniń áleýetin paidalana otyryp tereńdetýge daiyn ekenin aitty. Majarstannyń Syrtqy ister jáne syrtqy saýda ministri Túrkistannyń rýhani astana retindegi mańyzdy róline toqtaldy.
"Sizdiń, Prezident myrza jáne Elbasynyń Majarstanda bedelderińiz zor. Biz Qazaqstan men onyń halqynyń dostyq, baýyrlastyq qatynasyn sezinemiz. Túrkitildes memleketterdiń yntymaqtastyq keńesine baqylaýshy retinde qatysýymyz elderimiz arasyndaǵy strategiialyq seriktestiktiń nátijesi. Qazaqstan biz úshin - mańyzdy strategiialyq seriktes", - dedi Peter Siiarto.
Taraptar Viktor Orbannyń 2019 jyly sáýirde Qazaqstanǵa jasaǵan resmi sapary barysynda qol jetkizgen ýaǵdalastyqtardy júzege asyrý jónindegi ekijaqty qatynastarǵa qatysty birqatar máseleni talqylady.
