Foto: inbusiness.com
Memleket basshysy Qasym-Jomart Toqaev Úkimetke Jańaózendegi, Qashaǵandaǵy jáne Qarashyǵanaqtaǵy gaz óńdeý kásiporyndarynyń qurylysyn tezdetýdi tapsyrdy.
"Munai-gaz-himiia salasyn odan ári damytý – mańyzdy mindet. Biz polipropilen jáne polietilen shyǵaratyn iri óndiristik jobalardy júzege asyra bastadyq. Býtadien, karbamid, tereftal qyshqylyn óndirýge arnalǵan basqa da bolashaǵy zor jobalar qolǵa alynyp jatyr.
"Orta Aziia – Ortalyq" magistraldi gaz qubyrynyń elimizge tiesili 800 shaqyrymnan astam bóligin jańǵyrtý jumysy óte qysqa merzimde aiaqtaldy. Gaz tasymaldaý baǵdarlaryn ártaraptandyrý jáne onyń qýatyn arttyrý qajet. Turǵyndardy jáne ekonomikany gazben qamtamasyz etý – Úkimettiń basty mindetiniń biri", - dedi ol.
Onyń sózinshe, byltyr birqatar gaz kenishi igerile bastaǵan. Sondai-aq jylyna jalpy kólemi bir milliard tekshe metr gaz óndiretin jańa ken oryndaryn igerý josparlanyp otyr. Ázirge bul jobalar tolyq iske qosylǵan joq. Sondyqtan gazdy ishki naryqqa tiimdi bólý qajet. Jylý elektr ortalyqtaryn jáne qarapaiym tutynýshylardy kómir ornyna gaz jaǵýǵa kóshirý jumysyn baiyppen júzege asyrǵan jón.
"Úkimetke Jańaózendegi, Qashaǵandaǵy jáne Qarashyǵanaqtaǵy gaz óńdeý kásiporyndarynyń qurylysyn tezdetýdi tapsyramyn. Bul – basty mindet. Osy salany tabysty damytý úshin investitsiianyń qaitarymyn qamtamasyz etetin pármendi yntalandyrý sharalaryn qysqa merzimde qabyldaý, sonyń ishinde aqylǵa syiymdy tarifter men kóterme baǵalardy belgileý kerek. Gaz kenishterine geologiialyq barlaý jasaý úshin jańa investitsiia tartý turǵysynan alǵanda bul sharalar óte mańyzdy. Áitpese, ekonomikany qajetti kólemde gazben qamtamasyz etý múmkin emes", - dedi ol.
