Qasym-Jomart Toqaev Ulybritaniia jáne Soltústik Irlandiia Qurama Koroldiginiń Patshaiymy II Elizavetaǵa jubaiy Hanzada Filipptiń qaitys bolýyna bailanysty kóńil aitý jedelhatyn joldady, - dep habarlaidy "Ult aqparat" Aqorda saityna silteme jasap.
Memleket basshysy Qasym-Jomart Toqaev Edinbýrg gertsogi, Hanzada Filipptiń qaitys bolǵany týraly qaiǵyly habardy tereń kúizelispen qabyldady.
"Qazaqstan halqynyń jáne jeke ózimniń atymnan Uly Mártebeli Patshaiym Sizdiń jáne barsha britandyqtardyń qaiǵysyna ortaqtasa otyryp, kóńil aitamyn. 70 jyldan astam ýaqyt boiy, ásirese, Uly Mártebeli Patshaiym Siz taqqa otyrǵan sátten bastap, Edinbýrg gertsogi turaqty tiregińiz jáne kúsh-jigerińizdiń sarqylmas kózi boldy.
Ol Ekinshi dúniejúzilik soǵystyń qurmetti batyry, búkil ómirin Birikken Koroldik pen onyń Tájine qyzmet etýge arnaǵan, muqtaj jandarǵa kómektesip, Britaniia ultynyń, Dostastyq pen odan tys jerlerdegi halyqtyń ál-aýqatyn arttyrýǵa úles qosqan asa kórnekti, Uly Mártebeli biik tulǵa boldy. Osyndai qiyn sátte bizdiń duǵamyz Sizdiń Uly Mártebeńizge, Koroldik otbasyńyzǵa, sondai-aq, Hanzada Filippti biletin jáne qyzmettes bolǵan adamdarǵa arnaldy. Ol bizdiń jadymyzda parasattylyq pen ádildiktiń, batyldyq pen óz halqyna adaldyqtyń simvoly retinde máńgi saqtalady", - delingen jedelhatta.
