Foto: Akorda.kz
Aqordada Memleket basshysy Qasym-Jomart Toqaevtyń tóraǵalyǵymen keńes ótti. Jiynda Ulttyq banktiń 2022 jyly atqarǵan qyzmeti týraly esep berildi, dep habarlaidy "Ult aqparat" Prezidenttiń baspasóz qyzmetine silteme jasap.
Is-sharaǵa Ulttyq bank tóraǵasy Ǵalymjan Pirmatov, Prezident Ákimshiligi Basshysynyń birinshi orynbasary Timýr Súleimenov, Premer-Ministrdiń orynbasary – qarjy ministri Erulan Jamaýbaev, Qarjy naryǵyn retteý jáne damytý agenttiginiń tóraǵasy Mádina Ábilqasymova, Ulttyq ekonomika ministri Álibek Qýantyrov qatysty.
Qasym-Jomart Toqaevqa 2022 jylǵy aqsha-kredit saiasatynyń júzege asyrylý nátijeleri, qarjy turaqtylyǵyn qamtamasyz etý sharalary, sondai-aq Ulttyq banktiń altyn-valiýta qory men Ulttyq qor aktivteriniń jai-kúii jóninde baiandaldy.
Prezidentke ótken jyldyń qorytyndysy boiynsha ekonomikany dollarlaý kórsetkishi 31,6 paiyzǵa azaiǵany, ekinshi deńgeidegi bankterdiń ekonomikaǵa kredit bólý kólemi 23,3 paiyzǵa artyp, 22,8 trillion teńgege deiin jetkeni, sonyń ishinde bizneske berilgen kredittiń 13,9 paiyzǵa ósip, 9,6 trillion teńgeni quraǵany jóninde málimet berildi. Jalpy ekonomikaǵa bólingen kredit 2022 jyly 21,7 paiyzǵa ósti. 2023 jyldyń 1 qańtaryndaǵy málimet boiynsha onyń kólemi 28,9 trillion teńgeni qurady.
Ulttyq banktiń deregi boiynsha byltyr jalpy halyqaralyq rezervter 1,2 milliard dollarǵa kóbeiip, 90,8 milliard dollarǵa jetti. Sonyń ishinde altyn-valiýta qory – 35,1 milliard dollar, Ulttyq qor aktivteri – 55,7 milliard dollar. 2014 jyly biriktirilgen ýaqyttan beri BZJQ zeinetaqy aktivteri kirisiniń jyldyq mólsheri 9,33 paiyzdy qurady.
Ulttyq banktiń málimeti boiynsha Fitch Ratings jáne S&P Global Ratings halyqaralyq reiting agenttikteri Qazaqstannyń «VVV» deńgeiindegi derbes reitingine qatysty «turaqty» degen boljamdy rastady.
Memleket basshysynyń aitýynsha, infliatsiia, makroekonomikalyq jáne energetikalyq turaqsyzdyq áli de ekonomikanyń negizgi túitkilderi retinde saqtalyp otyr.
– Halyqaralyq uiymdar Halyqaralyq valiýta qorynyń baǵalaýy boiynsha jahandyq ósim 2021 jylǵy 6,2 paiyzdan 3,4 paiyzǵa deiin aitarlyqtai báseńdeitinin jáne baǵa qysymy kúsheietinin boljap otyr. Munyń bári elimizdiń ekonomikalyq damýyna áser etedi, sondai-aq Úkimet pen Ulttyq bankke jáne basqa da memlekettik organdarǵa anaǵurlym úilesimdi ári tiimdi jumys júrgizý qajet ekenin bildiredi, – dedi Qasym-Jomart Toqaev.
Talqylaý qorytyndysy boiynsha Prezident jyldyq esepti maquldady.
