Qazaqstan Prezidenti UQShU-nyń Máskeýde ótken mereitoilyq sammitine qatysty, dep habarlaidy "Ult aqparat" Aqordanyń resmi saityna silteme jasap.
Qasym-Jomart Toqaev Ujymdyq qaýipsizdik týraly shartqa qol qoiylǵanyna 30 jyl jáne Uiymnyń qurylǵanyna 20 jyl tolýyna orai ótken UQShU-ǵa múshe memleketterdiń Ujymdyq qaýipsizdik keńesiniń mereitoilyq sessiiasyna qatysty.
Mereitoilyq jiynǵa Qazaqstan kóshbasshysynan basqa Armeniianyń Premer-ministri Nikol Pashinian, Belarýs Prezidenti Aleksandr Lýkashenko, Qyrǵyzstan Prezidenti Sadyr Japarov, Tájikstan Prezidenti Emomali Rahmon, Resei Prezidenti Vladimir Pýtin, sondai-aq UQShU-nyń bas hatshysy Stanislav Zas qatysty.
Memleket basshysy kezdesýge qatysqandarǵa iltipat bildirip, mereitoilyq sessiiany uiymdastyrǵany úshin Vladimir Pýtinge rizashylyǵyn aitty.
Qazaqstan Prezidenti UQShU-nyń 30 jyl ishinde odan ári damý úshin zor áleýeti bar kópjaqty yntymaqtastyqtyń naqty mehanizmi retinde qalyptasqanyn atap ótti.
Qasym-Jomart Toqaev beibitshilik pen turaqtylyqty, halyqaralyq jáne aimaqtyq qaýipsizdikti saqtaý, múshe memleketterdiń aýmaqtyq tutastyǵy men egemendigin qorǵaý UQShU-nyń basty mindeti ekenin aitty. Prezident UQShU-nyń turaqty jumys organdarynyń tabysty qyzmetine, ártúrli formattaǵy tyǵyz yntymaqtastyqty, sondai-aq Uiymnyń kúshtik, quqyq qorǵaý jáne bitimgershilik áleýetin kúsheitý máselesine toqtaldy.
Memleket basshysy sóilegen sózinde halyqaralyq terrorizm men ekstremizmge, zańsyz esirtki jáne qarý-jaraq ainalymyna, kóshi-qonǵa, sonyń ishinde Aýǵanstandaǵy ahýaldyń órshýine qarsy is-qimyl máselelerine erekshe nazar aýdardy.
– Aýǵanstandaǵy jaǵdai, sondai-aq osy eldiń aýmaǵyndaǵy qarýly toptardyń belsendi áreketi memleketterimizdiń qaýipsizdigi men turaqtylyǵyna qater tóndirip otyr. UQShU barlyq yqtimal qaýip-qaterlerdi eskerip, Ortalyq Aziianyń ońtústik shekaralarynyń qaýipsizdigin qamtamasyz etýge kóbirek kóńil bólýi kerek dep esepteimin, – dedi Qazaqstan Prezidenti.
Qasym-Jomart Toqaev UQShU bitimgershilik kúshteriniń áleýetin nyǵaitý Uiym qyzmetiniń taǵy bir ózekti mindeti ekenin aitty.
– Bizdiń oiymyzsha, qazirdiń ózinde UQShU-ny BUU-nyń bitimgershilik qyzmetimen bailanystyrý mindetin kún tártibine qoiý qajet. Bul qadam Ujymdyq qaýipsizdik sharty uiymynyń sýbekt retindegi quqyǵyn nyǵaitady. Sondai-aq Uiymnyń beibitshilikti saqtaý jónindegi halyqaralyq bitimgershilik operatsiialarǵa qatysý tájiribesin qamtamasyz etedi, – dedi Memleket basshysy.
Kezdesý qorytyndysy boiynsha UQShU-ǵa múshe memleketterdiń basshylary Ujymdyq qaýipsizdik keńesiniń mereitoilyq málimdemesin qabyldady.
