Memleket basshysy Qasym-Jomart Toqaev eńbek jáne jumyspen qamtý máseleleri boiynsha jiyn ótkizdi, dep habarlaidy "Ult aqparat" Aqordaǵa silteme jasap.
Jiynǵa Parlament depýtattary, Úkimet músheleri, qoǵamdyq uiymdardyń ókilderi jáne investorlar men iri kompaniialardyń basshylary qatysty.
Qazaqstan Prezidenti bul saladaǵy memlekettik saiasat halyqty laiyqty jumyspen qamtý jáne ádil eńbekaqyǵa negizdelýi tiis dep atap ótti. Ol úshin Úkimettiń aldyna shuǵyl sheshilýi tiis birneshe mindet qoidy.
– Birinshi. Eńbek naryǵynyń suranysyna sai mamandar daiarlaý. Tórtinshi óndiristik revoliýtsiia jańa mamandyqtardyń paida bolýyna ákeledi. Búginde alǵan bilimniń ýaqyt ótken saiyn jaramsyz bop qalýy jii kezdesedi. Úkimet bilim berý baǵdarlamalarynyń álemdik standartqa sai keshendi jańarýyn qamtamasyz etý qajet, – dedi Memleket basshysy.
Qazaqstan Prezidenti osy baǵytta aldaǵy úsh jylda aldyńǵy qatarly 180 kolledj ben 20 joǵary oqý ornynyń kúsheitiletin aitty. Úkimetke joǵary jáne kásibi tehnikalyq bilim berýdiń sapasyn baqylaý tapsyryldy.
Sapaly jumys oryndaryn qurý – ekinshi negizgi mindet.
– Bizdegi qurylyp jatqan jumys oryndarynyń kóbi qysqa merzimge beiimdelgen. Mundai ádispen halyqty tiimdi jumyspen qamtamasyz etý múmkin emes, eńbek naryǵyn ýaqytsha ǵana turaqtandyrady. Sondyqtan, biz eń aldymen maman jetispeitin óńdeý ónerkásibi, aýyl sharýashylyǵy, týrizm, qyzmet kórsetý, aqparattyq tehnologiialar salalarynda turaqty jumys oryndaryn ashýymyz qajet, – dedi Memleket basshysy.
Úshinshi mindet – Jumyspen qamtýdyń jańa qalyptary.
Qasym-Jomart Toqaev jahandyq tehnologiialyq trendter eńbek naryǵynyń keń kólemde transformatsiialanýyna ákeletinin aitty.
– Qazirgi kezde eńbek sharty, kásipodaq, eńbek demalysy siiaqty uǵymdar ózgeriske ushyraýda. Frilanserlerdiń, aýt-siafferlerdiń jáne basqalarynyń sany kóbeiýde. Osyǵan bailanysty normativtik retteýlerdi qaita qaraý qajet, – dedi Qazaqstan Prezidenti.
Memleket basshysy jastardy jumysqa ornalastyrýdy tórtinshi negizgi mindet retinde atap ótti.
– Joǵary oqý oryndardy bitirgen túlekterdiń jumysqa ornalasýy 50 paiyzdan sál ǵana asady. Bizdegi «Jasyl el», «Diplommen aýylǵa», «Serpin», «Jastar – El tiregi», «Jastar praktikasy» siiaqty baǵdarlamalardyń tiimdiligin arttyrý kerek. Olardyń qaisy naqty jumys isteidi, qanshasy júzege aspai jatyr? Osylardy qaita qaraý qajet. Bul máseleni udaiy nazarda ustaý kerek, – dedi Qasym-Jomart Toqaev.
Besinshi – inkliýzivtilik.
Qazaqstan Prezidenti Úkimetke «Eńbek» memlekettik baǵdarlamasy arqyly múmkindigi shekteýli azamattardyń jumysqa ornalasýyn qamtamasyz etýdi qarastyrýdy tapsyrdy.
– Búginde Qazaqstanda múmkindigi shekteýli 410 myń adam eńbekke qabiletti. Olardyń teń jartysy qalypty eńbek jaǵdaiynda jumys istei almaidy. Iaǵni, 120 myń adam jumysty qajet etip otyr, – dedi Memleket basshysy.
Qasym-Jomart Toqaev eńbek mobildiligin arttyrýdy altynshy mindet dep kórsetti.
– Bul máselege keshendi túrde qaraý kerek. Sheneýnikterge emes, adamdarǵa yńǵaily bolatyn tiimdi joldaryn qarastyrý qajet. Úkimet pen ákimderge birlesip mobildi eńbektiń tiimdiligin arttyrý tetikterin jasaýdy tapsyramyn, - dedi Qazaqstan Prezidenti.
Úkimetke júktelgen sońǵy mindet – genderlik teń quqyqty nyǵaitý. Qasym-Jomart Toqaev birtindep áielderdiń eńbegin qorǵaý, olardyń memlekettik basqarýdyń barlyq deńgeilerinde jáne korporativtik salalarǵa qatysýyn qamtamasyz etý sharalaryn ázirleý qajettigin aitty.
.jpeg)