Foto: Aqorda
Memleket basshysy Túrkiia Rejep Taiip Erdoǵannyń basshylyǵymen halyqaralyq arenadaǵy bedelin arttyryp kele jatqanyn airyqsha atap ótti, dep habarlaidy Ult.kz.
– Eń aldymen, kóregen kóshbasshy Rejep Taiip Erdoǵannyń jetekshiligimen Túrkiianyń osy aimaqta zor ról atqaratynyn aitqym keledi. Óńir álsin-álsin betpe-bet kelip otyrǵan ózekti máselelerdiń sheshimin tabýǵa elderimiz aitarlyqtai atsalysa alady dep oilaimyn. Oraily sátti paidalana otyryp, Prezident Erdoǵannyń kelesi aida Qazaqstanǵa jasaityn memlekettik saparyna erekshe mán berip otyrǵanymyzdy jetkizgim keledi, – dedi Qasym-Jomart Toqaev.
Sodan keiin Qazaqstan Prezidenti biyl álemdik qoǵamdastyq aldynda turǵan jáne jaqyn perspektivadaǵy halyqaralyq kún tártibin qalyptastyratyn negizgi syn-qaterler men úrdister jónindegi oi-pikirimen bólisti.
– Diplomattar men saiasatkerler adamzat jolairyqta tur degendi mysal etedi. Birikken Ulttar Uiymynyń burynǵy Bas hatshysy Kofi Annannyń: «Biz áli de jolairyqta turmyz» dep jii aitatyny esimde. Halyqaralyq shielenisti azaitýǵa qatysty aitar bolsaq, bul jaǵdai eshqashan ózgermeidi. Qazirgi qaqtyǵystar óńirlik aýqymnan shyǵyp, jahandyq sipatqa ie boldy. Árine, BUU – balamasy joq ámbebap uiym, sondyqtan árbir memleketke belgili bir jaýapkershilik júkteledi. Birikken Ulttar Uiymyna qoldaý kórsetý kerek ekenin jurttyń bári aitady. Bul – fakt. Biraq Uiymǵa qoldaý kórsetip qana qoimai, oǵan reforma jasaý kerek. Bul da shyndyq. Ashyǵyn aitqan jón, «Uiymǵa tez arada reforma jasalady» degenge eshkim senbeidi. Óitkeni BUU-ny reformalaý, ózgertý, qyzmetin qaita qaraý máselesin kópten beri kóterip júrmiz. Odan eshqandai nátije shyqqan joq. Birikken Ulttar Uiymyn reformalaý, eń aldymen, Qaýipsizdik Keńesinen bastalýy kerek ekenin moiyndaýymyz qajet, – dedi Memleket basshysy.
