Memleket basshysy Qasym-Jomart Toqaevtyń belgili reseilik jýrnalist Aleksei Pivovarovqa bergen suhbatynyń negizindegi «Prezident 2.0» derekti filmi jelide jariialandy, dep habarlaidy "Ult aqparat" Prezidenttiń baspasóz hatshysy Berik Ýálige silteme jasap.
«21 shildede «31 arnadan» Memleket basshysy Qasym-Jomart Toqaevtyń belgili reseilik jýrnalist Aleksei Pivovarovqa bergen suhbatynyń negizinde «Prezident 2.0» derekti filmi kórsetilgen edi.
Áńgime barysynda Qazaqstan Prezidenti óziniń ómirbaianyna, diplomatiialyq qyzmetine jáne jeke ustanymdaryna qatysty suraqtarǵa ashyq jaýap bergen bolatyn.
«31 kanal» osy suhbatty ózderiniń YouTube arnasyna ornalastyrǵan eken. Kórmei qalǵandar bolsa, Iýtýb arnasynan kórýlerine bolady», dep jazdy Berik Ýáli Facebook-tegi paraqshasynda.
Shildeniń sońynda "31 arna" Qazaqstannyń jańa basshysy týraly "Prezident 2.0" derekti filmin kórsetti. Toqaev 1988 jyly Qytaida jemqorlarǵa ólim jazasyn oryndaǵan sátke kýá bolǵanyn moiyndady. Sondai-aq memleket basshysy óziniń minezin synaityndarǵa jaýap berdi.
"Men ózimdi ózgertpeimin. Osy qalpymda qabyldańyzdar", - dedi Toqaev.
Qasym-Jomart Toqaev 30-jyldary óz otbasynyń basynan ótken qaiǵyly oqiǵany baiandady. Prezidenttiń aitýynsha, atasy nan tabýǵa ketip, úiine oralmaǵan. Ákesi aǵasy Qasymmen birge balalar úiine, sodan keiin maidanǵa attanǵan. Toqaev 30-jyldary Qazaqstanda bolǵan asharshylyqqa orys halqynyń qatysy joq ekenin erekshe atap ótti.
Prezident alǵashqyda el basqarý úirenshikti jaǵdai bolmaǵanyn aitty.
"Ásirese, kópshilik jinalǵan is-sharalarda úirenshikti bolǵan joq. "Prezident, prezident" degendi estigende, Nursultan Ábishuly Nazarbaev kelip qalǵan shyǵar dep oilaitynmyn. Biraq bul ýaqytsha ǵana nárse eken, jaqsy nársege tez úirenesiń", - dedi Toqaev.
Qazaqstannyń tuńǵysh prezidenti Nursultan Nazarbaev 2019 jyldyń naýryzynda memleket basshysy qyzmetinen ketti. 9 shildede ótken kezekten tys sailaýdyń qorytyndysy boiynsha Qasym-Jomart Toqaev prezident bolyp sailandy (ol 70,96% sailaýshynyń qoldaýyna ie boldy).
