Túrkiianyń Ystambul qalasynda tolassyz jaýǵan jańbyr saldarynan kóshelerdi, jerasty ótkelderin, úiler men kásip nysandaryn sý basty. Tabiǵi qubylys kólik qozǵalysyna kedergi keltirip, qalada tótenshe jaǵdai qyzmetterine 2,5 myńnan astam habarlama tústi, dep habarlaidy ult.kz Anadolý Agentligi aqparat portalyna silteme jasap.
14 qazanda tańǵy saǵat 06:00-den keshki 20:00-ge deiin qutqarý qyzmetterine 2 518 habarlama túsken. Onyń 1 277-si sý basýǵa, 15-i kóshkinge qatysty bolǵan. Sonymen qatar 47 adam sý basqan aýmaqta qalyp qoiǵany habarlandy.
Qaladaǵy eń kóp jaýyn Beikoz aýdanynyń Ómerli bóliginde tirkelgen. Munda bir sharshy metrge 193,84 millimetr jaýyn-shashyn túsken. Saryier aýdanynda bul kórsetkish 124,72 millimetrge jetken.
Nóser saldarynan 808 turǵyn úi men 280 kásip nysanyn sý basqany týraly habarlama túsken. Kei aýdandarda joldar opyrylyp, metro stantsiialary men aýrýhanalarǵa da sý kirgen.
Tabiǵi apat saldarynan 14 jastaǵy bala qaza tapqan. Aldyn ala málimet boiynsha, ol Fatih aýdanyndaǵy Balat aýmaǵynda jańbyr sýyn basyp, elektr togyna túsken. Ony aýrýhanaǵa jetkizgenimen, dárigerler aman alyp qala almaǵan.
Qala biligi turǵyndardy asa qajet bolmasa, syrtqa shyqpaýǵa shaqyrdy. 15 qazanda Ystambuldaǵy mektepterde sabaq toqtatylyp, mototsiklder men ózge de eki dóńgelekti kólikterdiń qozǵalysyna shekteý qoiyldy. Qutqarý jumystaryna shamamen 8 myń maman men 2 myń tehnika jumyldyrylǵan.
