Memleket basshysy Qazaqstanǵa jumys saparymen kelgen Tatarstan Respýblikasynyń Prezidenti Rýstam Minnihanovpen kezdesý ótkizdi, dep habarlaidy "Ult aqparat" Aqordaǵa silteme jasap.
Qasym-Jomart Toqaev Tatarstanmen yntymaqtastyq Resei Federatsiiasymen aradaǵy keshendi is-qimyldardyń ishindegi eń mańyzdysy sanalatynyn atap ótti.
Memleket basshysy Tatarstan Prezidentiniń jaqynda Qaraǵandy oblysyna jasaǵan saparyn joǵary baǵalady. Sol sapar kezinde Saran qalasynda dóńgelek shyǵaratyn zaýyt iske qosylǵan bolatyn.
– Biz bul kásiporynǵa úlken úmit artyp otyrmyz. Qazaqstandyqtardyń úlken bir tobyna Tatarstanda bilim alýǵa múmkindik jasaǵanyńyz úshin rizashylyǵymdy bildiremin. Men muny budan keiin de jalǵasy bolatyn naqty joba dep bilemin. Bizdiń naryqta «Tatneft» kompaniiasynan basqa, «KamAZ» kásipornymen birlesken jobalarymyz da bar, – dedi Qazaqstan Prezidenti.
Qasym-Jomart Toqaev Tatarstanmen mádeni-gýmanitarlyq bailanystardy odan ári nyǵaita berýge beiildi ekenin jetkizdi.
– Biz tatar mádenietin óte jaqsy bilemiz jáne qurmetteimiz. Sizderdiń mádenietterińiz bizdiń elde keńinen tanymal. Taiaý ýaqytta, pandemiia bitkennen keiin Qazaqstanda Tatarstan mádenieti men óneriniń kúnderin ótkizýge kelisemiz dep oilaimyn. Biz bul is-sharanyń tabysty ótýi úshin barlyq jaǵdaidy jasaimyz, – dedi Memleket basshysy.
Qasym-Jomart Toqaev Rýstam Minnihanovqa Nur-Sultan qalasynan tatar halqynyń kórnekti ókili, aitýly aqyn Ǵabdolla Toqaidyń atyna bir kóshe beriletini jaiynda aitty. Bul eki halyq arasyndaǵy yntymaqtastyqtyń jarqyn belgisiniń biri bolmaq.
Óz kezeginde Tatarstan Prezidenti Qazaqstanǵa jasaǵan kezekti saparynyń tabysty ótkenine rizashylyǵyn bildirdi.
– Resei-Qazaqstan qarym-qatynastary aiasynda Tatarstan kóptegen jobalardy iske asyryp jatyr. Ekijaqty bailanystardyń irgetasy berik. Bizdiń Tuńǵysh Prezidentimiz Mintemir Sharipovich Shaimiev Sizge duǵai sálem aityp jatyr. Onyń Qazaqstannyń Tuńǵysh Prezidenti Nursultan Ábishulymen bailanysynyń arqasynda ózara qarym-qatynasymyzdyń negizi myqty qalanǵan, – dedi Rýstam Minnihanov.
Áńgimelesý barysynda taraptar Qazaqstan men Tatarstan arasyndaǵy saýda-ekonomikalyq, ónerkásiptik, energetikalyq kooperatsiialardy odan ári nyǵaitý, sondai-aq, koronavirýs pandemiiasymen birlesip kúresý máselelerin talqylady.
