Qazaqstan Prezidenti Syrtqy ister ministri Muhtar Tileýberdini qabyldady, dep habarlaidy Aqordanyń baspasóz qyzmeti.
Ministr Memleket basshysyna AQSh-qa jasaǵan resmi saparynyń negizgi nátijeleri men biylǵy 15-16 jeltoqsanda Madridte ótken «Aziia-Eýropa» Syrtqy ister ministrleri forýmynyń 14-keńesine qatysqany jóninde baiandady.
Muhtar Tileýberdiniń aitýynsha, kelissóz barysynda AQSh-tyń Memlekettik hatshysy Maik Pompeo Amerika Qurama Shtattarynyń Qazaqstandy óńirdegi senimdi seriktesi ári óńirlik qaýipsizdikti qamtamasyz etý isindegi negizgi áriptesi sanaitynyn aitty.
«Aziia-Eýropa» forýmynyń qatysýshylary Aziia men Eýropa elderin bailanystyratyn jáne kólik joldaryn damytýǵa yqpal etetin Qazaqstannyń tranzittik áleýetin joǵary baǵalady.
2020 jylǵa arnalǵan halyqaralyq kún tártibin talqylaý barysynda Qasym-Jomart Toqaev Qazaqstan Respýblikasynyń syrtqy saiasatyndaǵy basym baǵyttar jóninde birqatar naqty tapsyrma berdi.
