Qasym-Jomart Toqaev sybailas jemqorlyqqa qarsy is-qimyl jóninde keńes ótkizdi, dep habarlaidy "Ult aqparat" Aqordaǵa silteme jasap.
Jiyndy ashqan Memleket basshysy óz Jarlyǵyna sáikes Alik Shpekbaevtyń Sybailas jemqorlyqqa qarsy is-qimyl agenttiginiń tóraǵasy laýazymynan bosatylýyna bailanysty túsindirme jasady.
– Agenttikte onyń basshylyǵymen jemqorlyqpen kúreste aýqymdy jumys atqaryldy. Osy qurylymnyń qyzmeti aitarlyqtai jańǵyrdy. Jemqorlyqqa qarsy birqatar jobalar men bastamalar qolǵa alyndy. Solardyń qatarynda «ADALDYQ ALANY», «ANTIKOR ORTALYGY», «ADAL BILIM» jáne taǵy basqalary bar. Alik Jatqambaiulyna osy qyzmettegi tabysty jumysy úshin alǵys aitamyn, – dedi Prezident.
Sonymen qatar Qasym-Jomart Toqaev Sybailas jemqorlyqqa qarsy is-qimyl agenttiginiń tóraǵasy laýazymyna Marat Ahmetjanovtyń taǵaiyndalǵanyn jetkizdi.
– Marat Ahmetjanov Ádilet ministrliginde, Bas prokýratýrada basshylyq laýazymdardy atqardy. Kezinde Ekonomikalyq qylmysqa jáne sybailas jemqorlyqqa qarsy kúres agenttiginiń orynbasary boldy. Sondyqtan men ony osy laýazymǵa taǵaiyndaý týraly sheshim qabyldadym, – dedi Memleket basshysy.
Prezident memlekettiń qaýipsizdigi men halyqtyń ál-aýqaty sybailas jemqorlyqpen kúres jónindegi júieli sharalarǵa tikelei bailanysty ekenin aitty.
Osyǵan orai Qasym-Jomart Toqaev Agenttikke birqatar mańyzdy mindet júktedi. Ásirese, Memleket basshysy sybailas jemqorlyqqa qarsy is-qimyldy barlyq deńgeide tiimdi júrgizý úshin keshendi jumys atqarý qajet ekenine nazar aýdardy. Osy rette qabyldanǵan sharalar qylmystyq qýdalaý áreketimen ǵana shektelmeýi kerek.
– Memlekettik apparat sheshim qabyldaýdan tartynyp, biýrokratiiaǵa boi aldyrady jáne laýazymdy tulǵalar jeke jaýapkershilik alýdan jaltarady. Agenttik jumys barysynda jiberiletin qatelikterdi qasaqana jasalǵan qylmystardan ajyrata bilýge tiis. Sondai-aq, kináli adamdy qylmystyń barlyq quramy bolǵan kezde ǵana jaýapqa tartýy qajet, – dedi Qasym-Jomart Toqaev.
Memleket basshysy qoǵam ókilderiniń belsene atsalysýy jáne aldyn alý sharalary sybailas jemqorlyqqa qarsy kúrestiń basty quraldary ekenin atap ótti.
Prezident óziniń tapsyrmasy boiynsha «Qoǵamdyq baqylaý týraly» zań daiyndalyp jatqanyn habarlady. Bul qujat memlekettik organdardyń qoǵam aldyndaǵy ashyqtyǵy men eseptiligin qamtamasyz etýdi kózdeidi. Sondai-aq belsendi azamattardyń quqyqtyq baqylaý quraldaryn paidalanýyna múmkindik beredi.
Memleket basshysy «follow the money» qaǵidatynyń áleýetine toqtalyp, qylmystyq jolmen alynǵan múlikti izdestirý jáne tárkileý isine basa mán berýdi tapsyrdy. Qasym-Jomart Toqaev qylmystyq jolmen alynǵan dúnie-múlikti tárkileý jónindegi buljymas qaǵidat sybailas jemqorlyqqa qatysty kez kelgen is-árekettiń aldyn alýǵa septigin tigizýi tiis dep sanaidy. Memleket basshysynyń aitýynsha, Agenttik bul jumysty qarjy monitoringi organdarymen birlesip uiymdastyrýy qajet.
– Meniń tapsyrmam boiynsha qylmystyq protsestiń úsh býyndy modeli engizilip jatyr. Mundai model aiyptaýshylyq ustanymdy báseńdetip, qylmystyq protseske zańsyz aralasýdy boldyrmaidy. Agenttikke óz qyzmetin qylmystyq protsestiń úsh býyndy modeline beiimdeýdi tapsyramyn, – dedi Prezident.
Jiyn sońynda Memleket basshysy qoǵam, biznes jáne investorlar ózderin sybailas jemqorlyq qysymynan saqtaityn myqty qorǵan bar ekenin sezinýi qajettigin atap ótip, jańa tóraǵa Agenttik jumysynyń tiimdiligin odan ári arttyra túsetinine senim bildirdi.
