Sot júiesinde sýdialardy irikteý máselesinen bastap, tórelik printsipterin retteýge qatysty birqatar reformalar qajet. Bul týraly Memleket basshysy Qasym-Jomart Toqaev otandyq biznes ókilderimen kezdesýinde aitty, dep habarlaidy QazAqparat.
«Birinshi kezekte – kadr máselesi, óitkeni sýdialardy irikteý printsipterin jetildirmeiinshe, bul baǵytta jumsalǵan kúsh túgel tiimsiz bolyp qala beredi. Qazir sot júiesinde eki myńnan astam sýdia qyzmet etedi. Jyl basynan beri sot júiesinen emes, ózge salalardan kelgen 50 praktik-zańger sýdia boldy. Ilgerileý bar, biraq bul - jetkiliksiz. Jumysty barynsha kúsheitý qajet», - dedi Prezident.
Memleket basshysy ekinshi mańyzdy aspekt retinde sot tóreliginiń printsipteri týraly aitty. Jekemenshik pen múddeniń sotta qorǵalý kepildigi – ekonomikany damytý men investitsiia tartýdyń, iaǵni eldiń jalpy alǵa jyljýyn qamtamasyz etýdiń bazalyq sharty ekenine toqtaldy.
«Qazaqstanda memlekettik jáne jekemenshik qatar moiyndalady, teń dárejede qorǵalady. Bul - Konstitýtsiiada bekitilgen qaǵida. Alaida, bizde is júzinde jekelegen memlekettik organdardyń múddesin qorǵaýǵa basymdyq berilip ketedi. Olar memlekettiń múddesi retinde jańsaq qabyldanady. Ákimshilik ádiletti engizý arqyly biz bul úrdiske tosqaýyl qoia aldyq, biraq jumys áli de kóp», - dedi Toqaev.
Prezident sot tóreliginde ádildik pen beitaraptyqtan basqa printsip bolýy múmkin emestigin aitty.
«Sot júiesin reformalaýdyń ýaqyty keldi. Biz bul qajettilik týraly sheteldik investorlardan da, óz kásipkerlerimiz ben otandastarymyzdan da estip júrmiz. Sondyqtan, jýyq arada osy baǵytta naqty ári aýqymdy sharalardy jariia etemin», - dedi Memleket basshysy.
