Qasym-Jomart Toqaev Soltústik ekonomikalyq yntymaqtastyq – 2020 Halyqaralyq forýmynda beineúndeý jasady. «COVID-19-dan keiingi jahandyq ózgerister jáne soltústik ekonomikalyq yntymaqtastyqtyń keleshegi» taqyrybyndaǵy shara búgin Seýl qalasynda bastaldy, dep habarlaidy "Ult aqparat" Aqordaǵa silteme jasap.
Memleket basshysy Qasym-Jomart Toqaev Prezident Mýn Chje In bastamashy bolǵan jáne sońǵy úsh jyldyń ishinde óziniń ózektiligi men ómirsheńdigin dáleldegen «Jańa Soltústik saiasat» strategiiasyn joǵary baǵalap, Ońtústik Koreia basshysynyń órkendegen, ózara bailanysy myǵym jáne turaqty Eýraziia qurý kóregen ideiasyn quptady.
Qazaqstan Prezidentiniń pikirinshe, qazirgidei álem koronavirýs pandemiiasynyń teńdessiz tegeýrinderine tap bolǵan kezde saiasi jiger men ekonomikalyq sana sinergiiasy erekshe mánge ie.
Qasym-Jomart Toqaev Qazaqstan men Ońtústik Koreia arasyndaǵy strategiialyq yntymaqtastyqtyń ortaq qundylyqtarǵa, ózara qoldaý men tyǵyz bailanystarǵa negizdelgenin aita kele, elimizde ómir súrip jatqan, dostyqtyń «altyn kópiri» sanalatyn júz myń korei qaýymdastyǵynyń eki el arasyndaǵy qarym-qatynasqa qosqan úlesin atap ótti.
– Koreianyń Qazaqstan ekonomikasyna jasaǵan investitsiiasy 7 milliard dollardan asty. Jahandyq turaqsyzdyqqa qaramastan, ekijaqty taýar ainalymy artty. Ortalyq Aziianyń barlyq bes eliniń ortaq jalpy ishki ónimniń 70 paiyzy Qazaqstannyń úlesine tiesili. Korei memleketi - jetekshi investorlardyń arasyndaǵy 10-orynǵa ie. Bul rette, ózara tiimdi yntymaqtastyqty odan ary jalǵastyrýdyń áli de paidalanylmaǵan úlken áleýeti bar, – dedi Memleket basshysy.
Qazaqstan Prezidenti 2019 jyldyń sáýir aiynda Mýn Chje Inniń elimizge jasaǵan tarihi sapary ekijaqty ózara is-qimyldyń jańa belesin ashty dep sanaidy. Sapar aiasynda qol qoiylǵan «Samal jel» baǵdarlamasy qazaq-korei ekonomikalyq, saýda jáne mádeni jan-jaqty bailanystardy jandandyrýǵa baǵyttalǵan.
Sonymen qatar Qasym-Jomart Toqaev «Samal jel» baǵdarlamasy men «Jańa Soltústik saiasat» strategiiasy «Tsifrly Qazaqstan», «Nurly jol» sekildi ulttyq baǵdarlamalarda belgilengen strategiialyq mindetterge sáikes keletinin aitty.
Memleket basshysy álemdegi uzaqqa sozylǵan munai dáýiriniń aiaqtalyp kele jatqanyn aityp, Qazaqstan úshin ártaraptandyrylǵan jáne turaqty ekonomika qurýdyń erekshe mańyzdy ekenin atap ótti.
– Osyǵan bailanysty men Jańa ekonomikalyq baǵyttyń bastamashysy boldym. Bul baǵyt qurylymdyq reformalarmen ǵana emes, sondai-aq barynsha qarqyndy ári myqty memleket qurýmen bailanysty. Qazaqstan korei investorlary úshin arnaiy ázirlengen quraldardy usynýǵa ázir. Bul rette, salyq jáne keden artyqshylyqtary, jobalardy qosa qarjylandyrý, eksportty qoldaýdyń ishinara kepildikteri men tetikterin aitýǵa bolady, – dedi Prezident.
Memleket basshysy aǵylshyn quqyǵy boiynsha qyzmet kórsetetin «Astana» halyqaralyq qarjy ortalyǵynyń áleýetin de sóz etti. Prezident bul ortalyqtyń sheteldik bizneske arnalǵan ekojúiesiniń biregeiligin erekshe atap ótti.
Sóz sońynda Qasym-Jomart Toqaev forým qatysýshylaryna jumystyń tabysty, al Ońtústik Koreia Prezidenti men Úkimetiniń igi bastamalarynyń sátti bolýyna tilektestik bildirdi.
