Prezident Beijińde ótip jatqan XXIV qysqy Olimpiada oiyndarynyń qatysýshysy Abzal Ájiǵalievti qoldap, jedelhat joldady, dep habarlady Memleket basshysynyń baspasóz hatshysy Berik Ýáli Feisbýktegi paraqshasynda.
«Qazaqstandyqtar ózińniń «Beijiń-2022» XXIV qysqy Olimpiada oiyndarynda kórsetken ónerińdi asqan qyzyǵýshylyqpen tamashalady. Olimpiadanyń ashylý saltanatynda kók týdy jelbiretip alyp shyqtyń. Óz jankúierlerińniń senimin aqtap, short-trekten 500 metrge júgirýde finaldyq básekege deiin jetip, nátijesinde 4-oryn ielendiń. Bul osy sport salasy boiynsha joǵary kórsetkish ekeni anyq» delingen Memleket basshysynyń jedelhatynda.
Qasym-Jomart Toqaev sportshyǵa dúbirli dodada naǵyz erik-jiger kórsetkeni jáne jeńiske degen umtylysy úshin alǵys aitty. Sondai-aq onyń aldaǵy ýaqytta úlken jetistikterge jetip, otandastarymyzdy qýanta beretinine senim bildirdi.
