Qazaqstan Prezidenti elshilerden senim gramotalaryn qabyldady, dep habarlaidy "Ult aqparat" Aqordaǵa silteme jasap.
Memleket basshysy Aqordada Tailand Koroldiginiń Tótenshe jáne ókiletti Elshisi Rassa Djalichandradan, Iordaniia Hashimittik Koroldiginiń Tótenshe jáne ókiletti Elshisi Iýsef Ábdelǵanidan, Venesýelanyń Tótenshe jáne ókiletti Elshisi Enrike Antonio Akýnia Mendozadan senim gramotalaryn qabyldady.
Qasym-Jomart Toqaev elshilerdiń bárin Qazaqstandaǵy diplomatiialyq missiialarynyń resmi túrde bastalýymen quttyqtap, memleketaralyq qatynastardy odan ári nyǵaitý isinde tabys tiledi.
Memleket basshysy Rassa Djalichandramen kezdesý barysynda Tailandtaǵy sailaýdyń tabysty ótýimen jáne eldiń jańa Premer-Ministriniń sailanýymen quttyqtady.
– Qazaqstan men Tailand barlyq salada, sonyń ishinde saiasi, ekonomikalyq jáne mádeni baǵyttarda dostyq qatynastardy jemisti damytyp keledi. Tailandqa bizdiń elimizden týrister kóp barady. Sizdiń elińiz – qazaqstandyqtardyń súiikti jerleriniń biri. Elderimiz arasyndaǵy ózara qarym-qatynastardy odan ári damytýǵa septigińizdi tigizetinińizge senimdimin, – dedi Memleket basshysy.
Qasym-Jomart Toqaev Iýsef Ábdelǵanimen kezdesýde Qazaqstan men Iordaniia arasyndaǵy yqpaldastyqtyń joǵary deńgeide ekenin atap ótti.
– Elderimiz arasyndaǵy qarym-qatynastardyń jaqsy damýyna Korol II Abdalla zor úles qosty. Búginde ekijaqty yntymaqtastyq ózara dostyq pen senim negizinde tabysty damyp keledi, – dedi Qazaqstan Prezidenti.
Qasym-Jomart Toqaev Enrike Mendozamen kezdesýde ózara bailanystardyń odan ári nyǵaia beretinine senim bildirip, diplomatiialyq jumysta tabys tiledi.
– Elshi myrza, jańa qyzmetińizben quttyqtaimyn. Siz Qazaqstandaǵy Venesýelanyń birinshi Tótenshe jáne ókiletti Elshisi bolǵandyqtan, eki tarap úshin de bul senim gramotasyn tapsyrý rásiminiń mańyzy zor. Basshylaryńyzdyń bizdiń elimizde elshilik ashý jáne diplomatiialyq missiia basshysy retinde sizdi jiberý jónindegi sheshimine rizashylyq bildiremin, – dedi Qasym-Jomart Toqaev.
