Foto: Akorda.kz
Memleket basshysy Saýd Arabiiasynyń Aýyl sharýashylyǵy ministri Abdýlrahman ál-Fadlidi qabyldady, dep habarlaidy "Ult aqparat" Aqordanyń baspasóz qyzmetine silteme jasap.
Prezident Saýd Arabiiasy Koroldiginiń Aýyl sharýashylyǵy, qorshaǵan ortany qorǵaý jáne sý resýrstary ministri Abdýlrahman ál-Fadlige iltipat bildire otyryp, onyń sapary eki el arasyndaǵy kópjaqty yntymaqtastyqty odan ári damytýǵa tyń serpin beretinin atap ótti.
Qasym-Jomart Toqaev Saýd Arabiiasynyń Taq muragerimen kelissózder barysynda qol jetkizilgen ýaǵdalastyqtardy júzege asyrý mańyzdy ekenine toqtaldy.
– Jiddaǵa saparym barysynda Taq murageri Muhammed ben Salman ben Ábdelaziz Ál Saýdpen kezdestim. Kezdesýde biz eki el arasyndaǵy tyǵyz yntymaqtastyq pen qarym-qatynasty odan ári nyǵaitý týraly kelisimge keldik. Bizdiń ózara ýaǵdalastyqtarymyz qazirdiń ózinde júzege asyrylyp jatyr jáne dáiekti túrde oryndalyp keledi, – dedi Prezident.
Óz kezeginde Abdýlrahman ál-Fadli qurmet kórsetip, qonaqjailyq tanytqany úshin Memleket basshysyna alǵys aitty. Sondai-aq Taq murageriniń Qazaqstanmen ózara tiimdi yntymaqtastyqty keńeitýge nietti ekenin rastady.
Ministr óz sózinde azyq-túlik qaýipsizdigi máselelerine erekshe nazar aýdardy.
– Ózińizge málim, azyq-túlik qaýipsizdigi – búkil álem úshin ózekti másele. Qazaqstan bul baǵytta negizgi ról atqarady dep sanaimyz, – dedi Abdýlrahman ál-Fadli.
Áńgimelesý barysynda saýda-ekonomikalyq yntymaqtastyq máseleleri jáne aýyl sharýashylyǵy men týrizm salalaryndaǵy ózara bailanys perspektivalary talqylandy.
