Foto: Akorda.kz
Prezident Qasym-Jomart Toqaev "Samuryq-Qazyna" AQ basqarma tóraǵasy Nurlan Jaqypovty qabyldady, - dep habarlaidy "Ult aqparat" Aqordanyń resmi saityna silteme jasap.
Kezdesý barysynda "Samuryq-Qazyna" aktsionerlik qoǵamyn odan ári damytý perspektivalary qarastyryldy.
Memleket basshysyna Qor toby aktivteriniń qunyn kóterý joldary týraly málimet berildi. Atap aitqanda, korporativtik basqarý esebinen portfeldi kompaniialardyń tiimdiligin arttyrý, "Tarifti investitsiiaǵa aiyrbastaý" baǵdarlamasyn iske asyrý, shaǵyn jáne orta biznesti qoldaý jáne satyp alýlardyń ashyqtyǵy esebinen importty almastyrý, sondai-aq sheteldik seriktestermen birlesip investitsiia quiý máseleleri qaraldy.
Sonymen qatar Prezidentke Qor qyzmetiniń kútiletin nátijesi, mańyzdy jobalar men jekeshelendirý baǵdarlamasynyń iske asyrylý barysy jóninde baiandaldy.
Kezdesý sońynda Qasym-Jomart Toqaev investitsiialyq jobalardy ýaqytyly iske asyrýǵa, Qordyń quramyndaǵy kompaniialar toby qyzmetiniń tiimdiligin jetildirýge qatysty naqty tapsyrmalar berdi.
