Foto: Aqorda
Memleket basshysy Qasym-Jomart Toqaev «Turkistan» gazetine bergen suhbatynda salyq reformasy men ekonomikalyq ózgeristerdiń halyqtyń ál-aýqatyna áseri týraly pikir bildirdi, dep habarlaidy Ult.kz.
Prezidenttiń aitýynsha, elde talqylanyp jatqan Jańa Salyq kodeksi jai ǵana fiskaldyq naýqan emes, salyq júiesin túbegeili qaita qurýdy kózdeidi. Reformanyń basty maqsaty – ekonomikanyń turaqty ósimin qamtamasyz etý.
– Buryn qosymsha qun salyǵyn 20 paiyzǵa deiin kóterý usynyldy. Alaida men Úkimetke onyń joǵarǵy shegin tórt satyǵa tómendetý týraly tapsyrma berdim. Jańa Salyq kodeksinde baqylaýǵa emes, memleket, biznes jáne azamattar arasyndaǵy seriktestikke basymdyq beriledi, – dedi Memleket basshysy.
Qasym-Jomart Toqaev ekonomikalyq reformalar kezinde qoǵamda alańdaýshylyq týyndaitynyn atap ótti. Onyń aitýynsha, mundai kezeńde barlyq saiasi jaýapkershilikti Memleket basshysy óz moinyna alýǵa tiis.
– Qazaqstan úshin basqa jol joq. Biz bir orynda turyp qalmai, alǵa jyljý úshin reformalardy qalaida júzege asyrýymyz kerek, – dedi Prezident.
Azamattarǵa keri áser etpeý úshin qys mezgilinde tarifterdiń ósýi ýaqytsha ákimshilik tásilder arqyly toqtatylǵan. Sonymen qatar biýdjet qarjysyn tiimdi paidalaný jáne qatań biýdjettik tártipti saqtaý jóninde Úkimetke tapsyrma berilgen. Byltyr Úkimet, Ulttyq bank jáne salalyq agenttikter birlesip, infliatsiiany tómendetýge baǵyttalǵan úsh jyldyq baǵdarlama qabyldady.
Prezident Qazaqstan ekonomikasynda «ortasha tabystar qaqpany» máselesi bar ekenin ashyq aityp, tabystyń infliatsiia saldarynan azamattardyń kúndelikti qajettilikterine ketip jatqanyn atap ótti. Sonymen birge biznes úshin nesie mólsherlemesiniń joǵary bolýy men ainalym qarajatynyń tapshylyǵy damýǵa kedergi keltirip otyrǵanyn aitty.
Qasym-Jomart Toqaev ekonomikany qurylymdyq jańǵyrtý arqyly teńsizdikti azaitý jáne turaqty ósimge qol jetkizý úshin naqty jospar bar ekenin jetkizdi.
