Foto: Aqorda
Memleket basshysy Astana Think Tank forýmynyń plenarlyq otyrysynda sóz sóiledi, dep habarlaidy Aqordanyń baspasóz qyzmeti.
QR Prezidenti Qasym-Jomart Toqaev jiyn qatysýshylaryna iltipat bildirip, bul dialog alańy Astana halyqaralyq forýmynyń aiasynda qurylǵanyn, eń ózekti jahandyq jáne óńirlik máseleler jóninde pikir almasýǵa arnalǵanyn atap ótti.
Memleket basshysy jiynda Resei-Ýkraina arasyndaǵy qaqtyǵysty sheshý máselesi jóninde pikir bildirdi.
"Kantsler Sholtspen kelissóz barysynda aitqanymdai, Reseidiń áskeri turǵydan jeńilmeitini anyq. Bul – Reseidiń áskeri áleýeti, Prezident Pýtin júrgizip otyrǵan saiasatty halqynyń qoldaýy jáne tarihtyń ózi dáleldep otyrǵan fakt. Sondyqtan biz qaqtyǵysty beibit túrde sheshý joldaryn qarastyrýdy, barlyq memlekettiń, sonyń ishinde Qytai men Braziliianyń aqylǵa qonymdy josparlaryn qoldaimyz. Basqa jol joq. Áitpese, soǵys qos tarapty da joiyp tynady. Keibir álemdik kúshter buǵan múddeli shyǵar. Biraq bul tyǵyryqqa tireitin jol. Konstrýktivti kelissózder arqyly beibitshilikke umtylý – álsizdiktiń belgisi emes, kerisinshe, strategiialyq parasattylyqtyń kórinisi", – dedi Prezident.
Prezident Qazaqstan halyqaralyq forýmdarda, sonyń ishinde BUU Qaýipsizdik Keńesinde orta derjavalardyń múddesin qorǵaýdy jalǵastyra beretinin jetkizdi.
"Biz halyqaralyq júieniń meilinshe inkliýzivti jáne ornyqty bolǵanyn qalaimyz. Memleketterdi úlken nemese shaǵyn dep bólmei, olarǵa jahandy jaqsartý úshin óz úlesin qosýǵa múmkindik berý kerek. Qazaqstan aldaǵy ýaqytta da álemdik arenada belsendi ról atqarýǵa daiyn. Biz diplomatiianyń, ekonomikalyq yntymaqtastyq pen kópjaqty basqarýdyń toǵysqan jerinde turmyz. Áriptesterimizben jáne seriktesterimizben birge áreket etý arqyly bolashaq álemniń kelbetin qalyptastyrýǵa atsalysa alamyz. Halyqaralyq tártip ózgerip jatqan kezeńde bizdiń jai ǵana baqylaýshy bolǵymyz kelmeidi. Kerisinshe, anaǵurlym teńgerimdi, ádil ári ornyqty ǵalamdyq júieniń arhitektorlary bolýǵa umtylamyz", – dedi Qasym-Jomart Toqaev.
