Qasym-Jomart Toqaevtyń tóraǵalyǵymen Reformalar jónindegi joǵary keńestiń kezekti otyrysy ótti, dep habarlaidy "Ult aqparat" Aqordaǵa silteme jasap.
Jiyn ulttyq jobalardy ázirleýge qatysty máselelerdi talqylaýdan bastaldy. «Jaily mektep» jobasy boiynsha Oqý-aǵartý ministri Ashat Aimaǵambetov baiandama jasady.
Ministrdiń aitýynsha, jobanyń maqsaty – mektepterdegi oryn tapshylyǵy máselesin júieli túrde sheshý. Jobanyń júzege asyrylýy 800 myń oqýshyǵa arnalǵan jańa formattaǵy mektepter salýǵa múmkindik beredi. Jańa qolaily mektepterdiń qazirgi salynyp jatqan mektepterden kontseptýaldy artyqshylyǵy mynada: qurylystyń biryńǵai standarty saqtalady, pán kabinetteri men zerthanalar tolyqtai jabdyqtalady, 1-4 synyp jáne 5-11 synyp oqýshylary úshin derbes blok bolady, sport zaldarynyń sany oqýshy sanyna qarai esepteledi jáne 1-4 synyp pen 5-11 synyp oqýshylary úshin bólek ornalastyrylady, ár mektepte qyzdar men uldardy eńbekke baýlýǵa arnalǵan ámbebap sheberhanalar men stýdiialar qarastyrylady. Osy jáne ózge de jańashyldyqtar balalarymyzdyń daǵdylary men qabiletterin jan-jaqty damytýǵa baǵyttalǵan.
Baiandamany tyńdaǵan Prezident bilim alý úshin durys jaǵdai jasaý memlekettiń asa mańyzdy mindeti ekenin atap ótti.
– Ókinishke qarai, búginge deiin kóp talqylanǵanyna qaramastan, úsh aýysymdy, apatty, eski mektepter máselesi sheshilgen joq. Sondyqtan osy ulttyq jobanyń júzege asyrylýy Úkimettiń de, jergilikti atqarýshy organdardyń da erekshe baqylaýynda bolýǵa tiis. Úkimet pen Esep komiteti árbir teńgeniń kózdelgen maqsatqa jumsalýyn qamtamasyz etýi qajet. Ákimder jyl sońyna deiin jer, infraqurylym jónindegi barlyq máseleni sheshýi kerek. Munda esh aqtalýdyń reti joq. Sondyqtan óńir basshylarynyń jeke jaýapkershiligin kúsheitý jónindegi usynysty qoldaimyn. Qurylysy 2023 jyly bastalýǵa tiis mektepter úshin jer ýchaskelerin bólý jáne infraqurylymǵa qosý jónindegi barlyq másele bir ai ishinde sheshilýi kerek. Qalǵandary jyl sońyna deiin. Úkimetke árbir óńirdiń osyndai mindettemelerin aiqyndap, olardyń oryndalýyn baqylaýdy tapsyramyn, – dedi Memleket basshysy.
Prezident ulttyq jobany kelesi jyldan bastap júzege asyrý úshin biyl barlyq qajetti normativtik aktilerdi qabyldaýdy tapsyrdy. Sonymen qatar Qasym-Jomart Toqaev Úkimettiń Samruk-Kazyna Construction-dy biryńǵai tapsyrys berýshi retinde aiqyndaý týraly usynysyn qoldady. Osy rette Prezident biýdjetten bólingen qarjynyń jumsalýyn qatań baqylaýǵa alý qajet ekenin aitty.
Memleket basshysy balalardyń oqýlyqqa toly úlken ári aýyr riýkzaktardy arqalap júrýge májbúr bolýyna bailanysty ata-analardyń shaǵymdaryna arnaiy toqtaldy. Bul balalardyń densaýlyǵyna ziian keltiretini anyq.
Ashat Aimaǵambetov problemalardy sheshýge baǵyttalǵan sharalar týraly baiandady. Onyń aitýynsha, tsifrlyq oqýlyqqa kezeń-kezeńimen kóshý isi júzege asyrylyp jatyr, sondai-aq jańa mektepter oqýshylardyń jeke zattaryn, aýystyratyn aiaq kiimderi men oqýlyqtaryn saqtaityn jeke shkaftarmen jabdyqtalady.
«Aýyldyq jerdegi densaýlyq saqtaý salasyn jańǵyrtý» atty ekinshi jobany Densaýlyq saqtaý ministri Ajar Ǵiniiat tanystyrdy. Onyń aitýynsha, joba barlyq aýyldyq eldi mekenderdi meditsinalyq infraqurylymmen qamtamasyz etýge jáne zamanaýi kópbeiindi ortalyq aýdanaralyq aýrýhanalar jelisin uiymdastyrýǵa baǵyttalǵan. Ákimdiktermen birlesip 655 nysannyń, onyń ishinde 253 medpýnkt, 160 dárigerlik ambýlatoriia jáne 242 feldsherlik-akýsherlik pýnkttiń qurylysy boiynsha daiyndyq jumystary bastaldy. Jobany iske asyrý meditsinalyq kómektiń qoljetimdiligin arttyrýǵa, aýyl halqyna jedel meditsinalyq kómek kórsetýdi qamtamasyz etýge, qan ainalymy júiesi aýrýlary saldarynan ólim-jitimdi 20 paiyzǵa tómendetýge, ómir súrý uzaqtyǵyn arttyrýǵa múmkindik beredi.
Prezident aýyl halqynyń 100 paiyzyn sapaly alǵashqy meditsinalyq kómekpen qamtamasyz etýdi kózdeitin jobanyń áleýmettik mańyzy zor ekenin atap ótti.
– Bul – memleket retinde bizdiń mindetimiz. Alaida bul - atqarylatyn barlyq jumystyń eń az bóligi. Sondyqtan jobanyń ekinshi komponenti – aýyr dertke shaldyqqandarǵa jáne jaraqat alǵandarǵa sapaly kómek kórsetý ýaqytyn qysqartýǵa múmkindik beretin kópbeiindi aýrýhanalardyń qurylysyna qatysty másele de mańyzdy. «Altyn saǵat» qaǵidasyn beker ustanbaidy – naýqasty jabdyqtalǵan aýrýhanaǵa neǵurlym tez jetkizse, onyń ómirin saqtap qalýǵa soǵyrlym múmkindik mol. Bul bastama qanainalym júiesiniń aýrýy saldarynan adam shyǵynyn azaitýǵa airyqsha tiimdi áser etedi dep úmittenemiz. Elimizdegi azamattardyń 35 paiyzy osy aýrýdan kóz jumady. Qazaqstanda EYDU elderimen salystyrǵanda, insýlt pen infarkttan 2 ese kóp qaitys bolady. Tipti, jastarymyz da kóz jumyp jatyr. Sońǵy úlgidegi tehnikamen jabdyqtalǵan kópbeiindi aýrýhanalar jelisi – bul ult saýlyǵyna qosylǵan zor úles ári tiimdi sheshim, – dedi Qasym-Jomart Toqaev.
Memleket basshysy onkologiialyq aýrýlardyń aldyn alý jáne emdeý máselelerin erekshe baqylaýǵa alýdy tapsyrdy.
Prezident ulttyq jobalardyń naqty nátijelerine qol jetkizýdiń mańyzdylyǵyn erekshe atap ótip, olardyń iske asyrylýyna monitoring júiesin qamtamasyz etýdi tapsyrdy.
Sondai-aq otyrysta Qazaqstan Respýblikasynyń 2060 jylǵa deiin kómirtegi beitaraptyǵyna qol jetkizý týraly másele qarastyryldy.
