Memleket basshysy Qasym-Jomart Toqaev QazaqGaz UK AQ basqarma tóraǵasy Sanjar Jarkeshovti qabyldady, - dep habarlaidy "Ult aqparat" Aqordanyń baspasóz qyzmetine silteme jasap.
Prezidentke QazaqGaz UK aktsionerlik qoǵamynyń biylǵy birinshi jartyjyldyqta atqarǵan qarjy-sharýashylyq jumystarynyń qorytyndysy, sondai-aq, ishki naryqty taýar gazymen qamtamasyz etý jónindegi tapsyrmasynyń oryndalý barysy týraly esep berildi.
Qasym-Jomart Toqaevqa ulttyq kompaniianyń qabyldaǵan shuǵyl sharalary ishki naryqtaǵy taýar gazynyń tapshylyǵyn boldyrmaýǵa múmkindik bergeni jóninde baiandaldy.
Sanjar Jarkeshovtiń aitýynsha, qazir ishki naryqtyń gazǵa degen suranysy tolyq qamtamasyz etilgen. QazaqGaz Qashaǵanda qýaty 1 milliard tekshe metr bolatyn gaz óńdeý zaýytyn salýǵa kirisken. Gazdy barlaý jáne óndirý jónindegi jańa jobalardy iske qosý arqyly resýrstyq bazany ulǵaitý jumystary júrgizilip jatyr. Sondai-aq, gaz salasyn damytýdyń 2022-2026 jyldarǵa arnalǵan keshendi jospary bekitilgen.
Memleket basshysyna kompaniianyń qyzmetine júrgizilip jatqan keshendi tekserý jumysynyń barysy týraly málimet berildi. Qazaqstannyń gaz tasymaldaý júiesine halyqaralyq tehnikalyq aýdit júrgizilip jatyr. Ulttyq kompaniianyń shyǵyndaryn ońtailandyrý nátijesinde jyl basynan beri 9 milliard teńge únemdelgen.
Budan bólek, QazaqGaz UK AQ basqarma tóraǵasy gazǵa qosylý jónindegi tehnikalyq sharttardy berý úshin talap etiletin qujattar tizimin qysqartý jumystary júrgizilip jatqanyn aitty.
Baǵa belgileýdiń áleýmettik ádil reformasyna qatysty sharalar kesheni ázirlenip, qaraýǵa usynylǵan.
Kezdesý sońynda Prezident birqatar mindet júktedi, sonyń ishinde elimizdegi gazben qamtý jumystarynyń qarqynyn arttyrý jóninde tapsyrma berdi.
