Qazaqstan men Resei arasyndaǵy XVI óńiraralyq yntymaqtastyq forýmyna qatysý úshin Ombyǵa kelgen Qasym-Jomart Toqaev Vladimir Pýtinmen kezdesti, dep habarlaidy "Ult aqparat" Aqordaǵa silteme jasap.
Memleket basshylary ekijaqty qatynastardy damytýdyń perspektivalary men óńirlik deńgeidegi yqpaldastyqtyń ózekti máselelerin talqylady.
Qasym-Jomart Toqaev qonaqjailyq tanytqany úshin Vladimir Pýtinge rizashylyq bildirip, forýmnyń tiimdiligi men tabystylyǵyn atap ótti.
– 2003 jyly Qazaqstannyń Tuńǵysh Prezidenti Nursultan Nazarbaev pen Sizdiń kúsh-jigerińizdiń arqasynda Ombyda óńiraralyq deńgeidegi alǵashqy kezdesý ótti. Bul mehanizm tolyqtai iske qosylyp, óńirler yqpaldastyǵynyń tiimdi quraly retinde ózin dáleldedi. Eki eldiń aimaqtary arasyndaǵy saýda kóleminiń artyp kele jatqany óte mańyzdy. Biz ónerkásip koopertsiiasynda, aýyl sharýashylyǵy salasyndaǵy yntymaqtastyqta zor tabystarǵa qol jetkizdik. Sondyqtan aýqymdy jumys atqaryldy dep oilaimyn, – dedi Qazaqstan Prezidenti.
Vladimir Pýtin Resei men Qazaqstannyń arasyn bailanystyratyn dástúrli forýmnyń mańyzdy ekenin aitty.
– Elderimizdiń arasyndaǵy qarym-qatynastar tabysty damyp keledi. Byltyr taýar ainalymy 14 paiyzdan asty. Investitsiia kólemi ulǵaia tústi. Biz turaqty túrde kezdesip otyramyz. Degenmen erekshe nazar aýdaratyn máseleler árqashan tabylady, – dedi Resei Prezidenti.
