Qasym-Jomart Toqaev «Aqorda» rezidentsiiasynda Nur-Sultan qalasyna resmi saparmen kelgen AQSh-tyń Memlekettik hatshysy Maikl Pompeony qabyldady, dep habarlaidy "Ult aqparat" Aqordaǵa silteme jasap.
Memleket basshysy amerikalyq diplomatqa iltipat bildirip, eki el arasynda diplomatiialyq qarym-qatynas ornaǵan kezden bastap ekijaqty yqpaldastyqty damytýda mol tabysqa qol jetkizilgenin atap ótti.
– Amerika Qurama Shtattary – Qazaqstannyń táýelsizdigin alǵashqylardyń biri bolyp moiyndaǵan el. Biz bul tarihi faktini únemi esimizde ustaimyz. Memleketterimiz arasynda kóptegen baǵyt boiynsha, onyń ishinde, iadrolyq qarýdy taratpaý, halyqaralyq terrorizmmen kúres jáne ekonomikalyq yntymaqtastyq sekildi salalarda tyǵyz qarym-qatynas ornaǵan. Sonymen qatar ózara yqpaldastyǵymyzdy odan ári damytý maqsatynda paidalanýǵa bolatyn áleýetimiz de bar, – dedi Qazaqstan Prezidenti.
Qasym-Jomart Toqaev Niý-Iork qalasynda ótken BUU Bas Assambleiasynyń 74-sessiiasy kezinde AQSh Prezidenti Donald Tramppen kezdeskenin atap ótip, Amerika kóshbasshysyna óziniń sálemin joldady. Sondai-aq Qazaqstan Prezidenti amerikalyq áriptesimen álemniń kez kelgen jerinde kezdesýge daiyn ekenin, degenmen, bul júzdesýdiń Qazaqstanda ótkenin jón sanaitynyn aitty.
Taraptar barlyq baǵyt boiynsha, onyń ishinde saýda, investitsiia, IT-tehnologiia, demokratiialyq qundylyqtardy ilgeriletý jáne halyqaralyq terrorizmge qarsy is-qimyl salalaryndaǵy ekijaqty bailanystardy tereńdetýdiń mańyzdylyǵyn atap ótti.
Memleket basshysy Qazaqstanda Aýǵanstan boiynsha arnaiy ókil laýazymyn ashýǵa nietti ekenimizdi aitty.
AQSh-tyń syrtqy saiasi vedomstvosynyń basshysy Qazaqstan Prezidentine qonaqjailyq kórsetkeni úshin alǵysyn aityp, eki eldiń ekonomika, halyqaralyq beibitshilik pen turaqtylyqty saqtaý baǵyttarynda dástúrli ári senimdi seriktestik qalyptasqanyn jetkizdi.
– Bizdiń ekonomikalyq bailanystarymyz óte jaqsy. Eki el arasynda tikelei áýe qatynasyn ashý múmkindigi qarastyrylýda. Energetikalyq baǵyttaǵy yntymaqtastyqtan bólek, basqa da salalardaǵy bailanystardy órkendetý úshin áleýetimiz zor. Prezident Donald Tramp sizge sálem joldady. Búgin osynda ózińizben kezdeskenime qýanyshtymyn, – dedi Maikl Pompeo.
Amerikalyq diplomat Qazaqstannyń «Jýsan» operatsiiasy aiasynda Taiaý Shyǵystaǵy qaqtyǵys aimaǵynan óz azamattaryn qaitaryp alǵanyn joǵary baǵalady. Ol elimizdiń Aýǵanstanda beibitshilik ornatýǵa, onyń ekonomikasy men adami áleýetin kúsheitýge qosqan úlesine toqtaldy.
Maikl Pompeo elimizde qolǵa alynǵan saiasi reformalar jaiynda da jyly pikirin aityp, onyń iske asýyna sáttilik tiledi.
Sonymen qatar taraptar óńirlik jáne jahandyq kún tártibindegi ózekti máselelerdi talqylady. AQSh-tyń Memlekettik hatshysy Amerikanyń Ortalyq Aziiaǵa qatysty jańa Strategiiasynyń negizgi erejeleri týraly málimet berdi.
Memleket basshysy S5+1 (Ortalyq Aziiadaǵy bes el + AQSh) dialogy formatynyń mańyzdy ekenin atap ótip, onyń 3 aqpanda Tashkentte ótetin kezekti otyrysynyń tabysty bolatynyna senim bildirdi.
Qasym-Jomart Toqaev pen Maikl Pompeo Áýe qatynastary týraly úkimetaralyq kelisimge qol qoiylǵanyn quptady. Atalǵan qujat «ashyq aspan» qaǵidattaryna jaýap beredi, sondai-aq, Qazaqstan men AQSh arasynda turaqty ári tikelei áýe reisin ashý úshin quqyqtyq negiz qalady.
