Qasym-Jomart Toqaev pen Sadyr Japarov keńeitilgen quramda kelissózder júrgizdi, dep habarlaidy "Ult aqparat" Aqordaǵa silteme jasap.
Memleket basshylary strategiialyq seriktestik pen odaqtastyqty odan ári nyǵaitýdyń perspektivalaryn talqylady. Sondai-aq óńirlik jáne halyqaralyq ózekti máseleler boiynsha pikir almasty. Keńeitilgen quramdaǵy kelissózderde saýda-ekonomikalyq bailanystardy arttyrýǵa jáne saiasi, energetikalyq, mádeni-gýmanitarlyq salalarda tyǵyz yqpaldastyq ornatýǵa basymdyq berildi.
Qyrǵyz delegatsiiasyna iltipat bildirgen Qasym-Jomart Toqaev eki eldi baýyrlastyq, dostyq jáne seriktestiktiń dástúrli joly bailanystyratynyn atap ótti. Memleket basshysy Qyrǵyzstan Prezidentiniń bul saparynyń mańyzy zor ekenin jáne eki el arasyndaǵy ózara yntymaqtastyqqa tyń serpin beretinin aitty.
– Biz qyrǵyz aǵaiyndarymyzdy qoldaýǵa jáne jan-jaqty kómek kórsetýge árdaiym daiyn ekenimizdi atap ótkim keledi. Biz baǵzy zamannan tatý kórshimiz, dostyǵymyz ben yntymaǵymyz jarasqan baýyrlas eldermiz. «Qazaq-qyrǵyz bir týǵan» degen naqyl sóz aramyzdaǵy zor senim men keń peiildi aiqyn kórsetedi, – dedi Qazaqstan Prezidenti.
Memleket basshysy shaǵyn formatta ótken kelissózder barysynda eki el arasyndaǵy yqpaldastyqtyń negizgi baǵyttary anyqtalǵanyn jetkizdi.
– Elderimiz arasynda sheshilmeitin qandai da bir máseleniń joq ekeni kóńil qýantady. Kerisinshe, biz ózara yqpaldastyqtyń kez kelgen baǵytyn jedel ári baiyppen qarastyrýǵa daiyn ekenimizdi bildirdik. Qyrǵyzstan Sizdiń basshylyǵyńyzben barlyq máseleni tiimdi sheshýge jáne buǵan deiin qol jetkizilgen ýaǵdalastyqtardy júzege asyrýǵa ázir ekenin naqtylaǵanyn durys qabyldadyq. Óz tarapymnan Qazaqstannyń eki el arasyndaǵy strategiialyq seriktestik pen odaqtastyq qarym-qatynastardy keshendi túrde tereńdetýge beiil bolyp qala beretinin aitqym keledi, – dedi Qasym-Jomart Toqaev.
Kezdesýde Qazaqstan Prezidenti qazaq pen qyrǵyz bailanysynyń tamyry tereńde ekenin aita kelip, uly Abai men Maǵjan Jumabaevtyń sózderin tilge tiek etti.
– Uly Abai aitqandai, «Esh qazaq qyrǵyz ben qazaqtyń bir tuqymdas ekenine talaspaidy». Qos halyqtyń rýhani týystyǵyn dáleldeitin mysaldar jetkilikti. Bul bailanystar Áýezov pen Aitmatov, Jambyl men Toqtaǵul, Kenen men Ospanqul siiaqty alyp tulǵalarymyzdyń tusynda nyǵaia tústi. Qazaqtyń áigili aqyny Maǵjan Jumabaev «Qyrǵyz – taýdyń tarpańy, qazaq – qyrdyń qulany» dep jyrlaǵan. Munyń bári bizdiń arǵy tegimizdiń bir ekenin ańǵartady, – dedi Qazaqstan Prezidenti.
Óz kezeginde Qyrǵyz Respýblikasynyń Prezidenti Qazaqstan basshylyǵy men halqyna koronavirýsqa qarsy kúreste qoldaǵany úshin jáne aldaǵy ýaqytta da aýqymdy kómek kórsete beretinine alǵys aitty.
– Búgingi kelissózder dástúr boiynsha memleketterimiz arasyndaǵy ózara qarym-qatynastardy sipattaityn odaqtastyq bailanystar men strategiialyq seriktestik rýhynda ótýde. Shaǵyn formatta ótken kezdesýde biz Qasym-Jomart Kemelulymen ekijaqty yntymaqtastyq pen óńirlik jáne halyqaralyq uiymdar aiasyndaǵy elderimizdiń ózara is-qimylynyń birqatar mańyzdy máselelerin qozǵadyq. Eki el arasynda eshqandai saiasi qaishylyq joq ekenin málimdeimin, – dedi Sadyr Japarov.
Kelissózder barysynda taraptar iskerlik bailanystardy jan-jaqty keńeitýge, investitsiialyq yqpaldastyqty damytýǵa, eki eldiń kólik-tranzittik áleýetin birlesip paidalanýǵa, sondai-aq, tsifrlandyrý salasyndaǵy birlesken jobalardy júzege asyrýǵa ýaǵdalasty.
Prezidentter qos halyqtyń mádenieti men tarihynyń jáne tiliniń uqsastyǵyn eskere otyryp, ǵylym, bilim, densaýlyq saqtaý, mádeniet, týrizm jáne sport salalaryndaǵy yntymaqtastyqty odan ári damytýǵa beiildi ekenin naqtylady.
Kelissózder qorytyndysy boiynsha tómendegidei qujattarǵa qol qoiyldy:
- Qazaqstan Respýblikasynyń Prezidenti men Qyrǵyz Respýblikasy Prezidentiniń birlesken Málimdemesi;
- Qazaqstan Respýblikasynyń Úkimeti men Qyrǵyz Respýblikasy Úkimetiniń arasyndaǵy qaitarymsyz áskeri-tehnikalyq kómek kórsetý týraly kelisim;
- Qazaqstan Respýblikasy Mádeniet jáne sport ministrligi men Qyrǵyz Respýblikasy Úkimetiniń janyndaǵy Jastar isi, dene shynyqtyrý jáne sport jónindegi memlekettik agenttik arasyndaǵy ulttyq sport túrleri men halyq oiyndaryn damytý týraly vedomstvoaralyq kelisim;
- Qazaqstan Respýblikasy men Qyrǵyz Respýblikasynyń Syrtqy ister ministrlikteri arasyndaǵy 2021-2022 jyldarǵa arnalǵan yntymaqtastyq baǵdarlamasy;
- Qazaqstan Respýblikasynyń Tsifrlyq damý, innovatsiialar jáne aeroǵarysh ónerkásibi ministrligi men Qyrǵyz Respýblikasy Úkimetiniń janyndaǵy Tsifrlyq damý memlekettik qyzmeti arasyndaǵy ózara túsinistik týraly memorandým;
- Qazaqstan Respýblikasy Saýda jáne integratsiia ministrligi men Qyrǵyz Respýblikasy Úkimetiniń janyndaǵy Ekologiialyq jáne tehnikalyq qaýipsizdik jónindegi memlekettik inspektsiianyń 2021-2022 jyldarǵa arnalǵan birlesken is-sharalar jospary;
- Qazaqstan Respýblikasy Energetika ministriniń, Ekologiia, geologiia jáne tabiǵi resýrstar ministriniń jáne Qyrǵyz Respýblikasy Energetika jáne ónerkásip ministriniń arasyndaǵy elektroenergiiamen taýar almasý týraly hattama;
- Qazaqstan Respýblikasynyń Qorǵanys ministrligi men Qyrǵyz Respýblikasynyń Qorǵanys ministrliginiń arasyndaǵy 2021 jylǵa arnalǵan yntymaqtastyq baǵdarlamasy.
