Memleket basshysy Qasym-Jomart Toqaev Resei prezidenti Vladimir Pýtinmen telefon arqyly sóilesti, dep habarlaidy "Ult aqparat" Aqordanyń resmi saityna silteme jasap.
Prezidentter eki memleket arasyndaǵy saýda-ekonomikalyq yntymaqtastyqtyń qazirgi jaǵdaiy men damý perspektivalaryn egjei-tegjeili talqylady.
Ekijaqty saýda-sattyqtyń qarqynyn saqtaý úshin eki el úkimeti arasynda eń mańyzdy taýar túrleri boiynsha yqpaldastyqty jandandyrý týraly ýaǵdalastyqqa qol jetkizildi.
Vladimir Pýtin Qasym-Jomart Toqaevqa Resei men Ýkraina arasyndaǵy kelissózderdiń barysy týraly málimet berdi. Ýkrainanyń beitaraptyq, bloktardan tys, iadrolyq qarýsyzdyq mártebesine qatysty ýaǵdalastyqqa qol jetkizýdiń asa mańyzdylyǵy jónindegi ortaq túsinistik týraly aityldy.
"Ria Novosti" agenttiginiń habarlaýynsha, telefon áńgime barysynda Resei prezidenti Vladimir Pýtin qazaqstandyq áriptesine "Donbasty qoldaý arnaiy operatsiiasy (Ýkrainadaǵy soǵysty Kreml osylai dep ataidy - red.) men Resei men Ýkraina kelissóziniń barysy" týraly málimet bergen.
Aita keteiik, Qazaqstan Reseidiń Ýkrainaǵa basqynshylyǵyn aiyptaǵan joq, qoldaǵan da joq. Biraq osy aptada Qazaqstan prezident ákimshiligi basshysynyń orynbasary Timýr Súleimenov eýropalyq aqparat jelisi – Euractiv saityna bergen suhbatynda "Ýkrainanyń aýmaqtyq tutastyǵyn qoldaitynyn", soǵysty soǵys dep ataitynyn jáne sanktsiia salynǵan taýarlardyń Reseige ótip ketpeýine bar kúshin salatynyn málimdegen. Súleimenov – Ýkrainadaǵy jaǵdaiǵa bailanysty ustanymyn ashyq jetkizgen Qazaqstandaǵy alǵashqy joǵary laýazymdy tulǵa.
