«Aqorda» rezidentsiiasynda Memleket basshysy Qasym-Jomart Toqaev pen Eýropalyq Keńes Prezidenti Sharl Mishelge Mańǵystaý oblysynda «jasyl» sýtegin óndirý jáne taratý ortalyǵyn qurý jobasy tanystyryldy, dep habarlaidy "Ult aqparat".
Investor Svevind Group kompaniiasy Mańǵystaý oblysynda qýaty jylyna 2 million tonna bolatyn «jasyl» sýtegi óndirisin qolǵa alýdy josparlap otyr. Joba boiynsha táýligine qýaty 255 myń tekshe metr sý tushytatyn qondyrǵy, 40 GVt jańartylatyn energiia stantsiiasyn (jel, kún) jáne negizinen eksportqa nemese ishki naryqta tutynýǵa arnalǵan 20 GVt sý elektrolizi óndirisin salý ári paidalaný kózdelip otyr.
Atalǵan jobany júzege asyrý barysynda, qurylys kezeńinde shamamen 3500, nysandardy kezeń-kezeńimen iske qosý kezinde 1800-ge jýyq jańa turaqty jumys orny ashylýy múmkin. Sondai-aq Mańǵystaý oblysynda maman daiarlaý úshin Germaniia men Qazaqstannyń joǵary oqý oryndary arasynda yntymaqtastyq ornatý qarastyrylǵan.
Budan bólek, investor esebinen infraqurylymdar salý jáne óńirdiń áleýmettik-ekonomikalyq damýyna áleýmettik mindettemeler tóleý josparlanyp otyr.
