Qazaqstan Prezidenti men Germaniia Kantsleri BAQ ókilderi úshin birlesken baspasóz máslihatyn ótkizdi, dep habarlaidy "Ult aqparat" Aqordaǵa silteme jasap.
Qazaqstan Prezidenti Germaniia Kantslerine qonaqjailyq kórsetkeni úshin rizashylyǵyn bildirip, Merkel hanymnyń eki el arasyndaǵy dostyq bailanystardy nyǵaitýǵa qosqan úlesin joǵary baǵalaitynyn aitty. Memleket basshysy aldaǵy ýaqytta Qazaqstan óziniń syrtqy saiasatyndaǵy sabaqtastyqty saqtap, Tuńǵysh Prezident – Elbasy Nursultan Nazarbaevtyń bastamalaryn jalǵastyra beretinin atap ótti.
Qasym-Jomart Toqaev Prezident retinde Eýropa odaǵy boiynsha alǵashqy resmi saparyn Germaniiadan bastaǵanyn aityp, Qazaqstan úshin osy elmen yntymaqtastyqty nyǵaitýdyń mańyzy zor ekenine toqtaldy. Sondai-aq Memleket basshysy bul sapardyń basty maqsaty eki el arasyndaǵy ekonomikalyq yntymaqtastyq pen saiasi yqpaldastyqqa jańa serpin berý ekenin jetkizdi.
– Germaniia ekonomikalyq áleýeti jaǵynan álemdegi tórtinshi memleket bolǵanymen, bizge tikelei investitsiia salyp otyrǵan elderdiń ishinde 12-orynda. Qazaqstan ártúrli saladaǵy 700-den astam jobany jekeshelendiretin bolady. Bul nemis investorlary men kompaniialaryna jaqsy múmkindik týǵyzady dep sanaimyn. Neǵurlym investitsiia kóp tartylsa, soǵurlym eki el úshin de tiimdi bolmaq, – dedi Memleket basshysy.
Sonymen qatar Qasym-Jomart Toqaev Qazaqstannyń Germaniia investorlary úshin arnaiy jeńildikter usynyp otyrǵanyn, bul eki tarapqa da óte tiimdi bolatynyn aitty.
Baspasóz máslihaty barysynda jýrnalister Germaniiaǵa eksporttalatyn taýar kóleminiń sońǵy 8 aida 21,4%, iaǵni 2,258 milliard eýroǵa tómendep ketkenin, sarapshylar munyń sebebin munai naryǵyndaǵy jaǵdaimen bailanystyryp otyrǵanyn surady.
– Rasynda, mundai úrdis bar. Búgingi saparymnyń basty maqsaty – osy jaǵdaidy meilinshe ózgertý. Sondyqtan kelissózder barysynda Kantsler hanymǵa birneshe naqty usynystarymdy jetkizdim, – dep jaýap berdi Qazaqstan Prezidenti.
Memleket basshysyna dýaldi bilim berý salasyna qatysty ekijaqty yntymaqtastyqtyń qazirgi jaǵdaiy men perspektivasyna bailanysty da suraq qoiyldy.
– Dýaldi bilim berý júiesinde nemis tájiribesin qoldanyp kelemiz. Aldaǵy ýaqytta bilim berý salasynda yntymaqtastyqty jalǵastyra beremiz, – dedi Prezident.
Germaniia Federativtik Respýblikasynyń Kantsleri Angela Merkel Qazaqstanmen arada berik yntymaqtastyqtyń ornaǵanyn, Elbasy Nursultan Nazarbaevpen ózara túsinistikte jumys istegenin atap ótip, Qasym-Jomart Toqaevtyń eki el arasyndaǵy yqpaldastyqty jańa deńgeige kóteretinine senim bildirdi, sondai-aq búgingi kelissózderdiń nátijeli ótkenin aitty.
