QR Prezidenti «Halyqaralyq qaryz arhitektýrasy jáne ótimdilik» atty joǵary deńgeidegi jiynǵa qatysty, dep habarlaidy Aqordanyń baspasóz qyzmeti.
Memleket jáne Úkimet basshylary deńgeiindegi onlain forýmdy ótkizýge BUU Bas hatshysy Antoniý Gýterrish, Kanada jáne Iamaikanyń premer-ministrleri Djastin Triýdo men Endriý Holness muryndyq boldy. Is-shara COVID-19 pandemiiasy kezeńinde halyqaralyq kúsh-jigerdi damý baǵytyn qarjylandyrý salasyna qarai jumyldyrýǵa arnaldy.
Teńizge shyǵatyn joly joq damýshy memleketter tobynyń tóraǵasy retinde sóz sóilegen Qasym-Jomart Toqaev koronavirýs pandemiiasy bastalǵaly beri Topqa múshe elder sheteldik investitsiialardyń azaiýy, saýda-sattyq pen aqsha aýdarymdarynyń tómendeýi, qarjylyq qaryzdardyń ósýi, ortasha alǵanda ekonomikanyń 2,4 paiyzǵa quldyraýyna sebep bolǵan biýdjet múmkindiginiń aitarlyqtai kemýi sekildi asa qaýipti qubylystarmen betpe-bet kelgenin atap ótti.
Memleket basshysy Teńizge shyǵatyn joly joq damýshy memleketter tobyna múshe elderdiń pandemiia saldarynan týyndaǵan qarjylyq qiyndyqtaryn jeńildetýge bailanysty birqatar naqty usynysyn ortaǵa saldy.
Qasym-Jomart Toqaev Dúniejúzilik banktiń daǵdarysqa qarsy 160 milliard dollar kólemindegi kómegi men Halyqaralyq valiýta qory beretin 1 trillion dollar kredit júiesin pandemiia saldarynan aitarlyqtai zardap shekken elderge bólý asa mańyzdy dep sanaidy. Prezident jahandyq qarjy qurylymdaryn, BUU institýttaryn, sondai-aq, ózge de halyqaralyq jáne óńirlik uiymdardy Teńizge shyǵatyn joly joq damýshy memleketter tobyna múshe elderdiń ekonomikalyq ósimdi qaita qalpyna keltirýge baǵyttalǵan is-qimyly kezinde olardyń erekshe qajettilikterine basa mán berýge shaqyrdy.
Sonymen qatar Qasym-Jomart Toqaev BUU-nyń Teńizge shyǵatyn joly joq damýshy memleketter tobyna múshe elderge arnalǵan Vena baǵdarlamasyn júzege asyrý jónindegi Jol kartasynyń ózektiligi arta túskenine toqtaldy. Osyǵan orai seriktes memleketterdi Addis-Abeba baǵdarlamasynda belgilengen barlyq jeti baǵyt boiynsha júrgiziletin jumystardy jumyla atqarýǵa, sondai-aq, damytý maqsatyndaǵy resmi kómektiń qazirgi deńgeiin saqtap qalýǵa úndedi.
Memleket basshysy halyqaralyq qoǵamdastyqty Teńizge shyǵatyn joly joq damýshy memleketter tobyna múshe elderdiń densaýlyq saqtaý júiesin damytýdy qoldaýǵa, sondai-aq, qajetti vaktsinany ýaqytyly jáne tiimdi baǵada satyp alýyna kómek kórsetýge shaqyrdy. Prezident Topqa múshe elderdiń ornyqty infraqurylymyn yntalandyrý jáne saýda-sattyq rásimderin jeńildetý, tsifrlyq transformatsiiaǵa qol jetkizýine qoldaý kórsetý qajettigi týraly atap ótip, jeke sektordyń qaita qalpyna keltirý jumystaryna belsendi qatysý kerektigin aitty.
Qasym-Jomart Toqaev memlekettik deńgeide qabyldanyp jatqan sharalarǵa toqtalyp, Qazaqstan «BUU-nyń gýmanitarlyq kómek kórsetý jónindegi jahandyq josparyn» júzege asyrýǵa eleýli úles qosqanyn jáne koronavirýsqa qarsy kúres kezinde birqatar shet memleketterge járdem bergenin eske saldy.
Memleket basshysy qazaqstandyq «KazAID» halyqaralyq damý agenttiginiń iske qosylǵany jaiynda málimdep, Ortalyq Aziia elderi men Aýǵanstanǵa qoldaý kórsetý múmkindigi bar BUU-nyń Ornyqty damý ortalyǵyn Almatyda ashý jumystary jaiynda aitty. Prezident Qazaqstannyń ózge memleketter men kópjaqty uiymdarǵa kórsetken qoldaýy retinde osyndai qadam jasap otyrǵanyn jetkizdi.
Qasym-Jomart Toqaev sóz sońynda vaktsina salýǵa jáne ekonomikany qaita qalpyna keltirýge birshama ýaqyt ketip, soǵan sáikes uzaqmerzimdi perspektivada onyń saldary ondaǵan jyldar boiyna saqtalýy yqtimal ekeni jaiyndaǵy boljamyn ortaǵa saldy. Onyń pikirinshe, azamattardyń osal toptaryn, elder men ekonomikany qorǵaý úshin qazirgi qabyldanyp jatqan sharalardyń barlyǵy ortaq múddeni kózdeidi. Memleket basshysy munyń daǵdarystan shyǵatyn birden-bir jol ekenine senimdi jáne ony halyqaralyq qoǵamdastyqtyń ortaq mindeti dep sanaidy.
Forýmǵa Argentina, Venesýela, Egipet, Italiia, Kanada, Pákistan, Túrkiia, Qatar, Frantsiia, Ekvador, Japoniia, Iamaika jáne basqa da memleketterdiń basshylary, sondai-aq, BUU Bas hatshysy Antoniý Gýterrish, Halyqaralyq valiýta qorynyń, Ekonomikalyq yntymaqtastyq jáne damý uiymynyń, Dúniejúzilik banktiń, Dúniejúzilik saýda uiymynyń, Eýropalyq odaq pen Afrikalyq odaqtyń jetekshileri qatysty.
