Memleket basshysy koronavirýs pandemiiasyna bailanysty jariialanǵan Tótenshe jaǵdai kezinde eki aptanyń ishinde salynǵan elordadaǵy modýldi juqpaly aýrýlar aýrýhanasyna bardy, dep habarlaidy "Ult aqparat" Aqordanyń baspasóz qyzmetine silteme jasap.
Meditsinalyq mekemeniń jalpy aýmaǵy 7 myń sharshy metrdi quraidy. Onyń qurylysyna respýblikalyq biýdjetten 5,5 milliard teńge bólindi. Meditsinalyq nysandy «BI Group» kompaniialar toby saldy.
Aýrýhana ǵimaraty tez qurastyrylatyn qurylys tehnologiiasyn paidalana otyryp, modýldik bloktardan turǵyzyldy. 200 orynǵa eseptelgen aýrýhana meditsina qyzmetkerleri men em alýshylardyń qaýipsizdigin qamtamasyz etetin zamanaýi quraldarmen jabdyqtalǵan.
Densaýlyq saqtaý ministri Eljan Birtanov Prezidentke indetke qarsy kúrestegi meditsinalyq kómektiń problemalary men ony jetildirý joldary týraly baiandady. Memleket basshysy naýqastardy emdeýge qajetti barlyq quraldarmen jabdyqtalǵan emdeý bólimsheleri men palatalardy aralap kórdi.
«BI Group» qurylys holdingi Direktorlar keńesiniń tóraǵasy Aidyn Rahymbaev Qasym-Jomart Toqaevqa qurylys jumystarynyń barysy men aýrýhananyń erekshelikteri týraly aitty.
Memleket basshysy atalǵan aýrýhananyń mundai tiptegi elimizdegi alǵashqy meditsinalyq mekeme ekenin atap ótip, ǵimaratty salǵan qurylysshylarǵa rizashylyǵyn bildirdi.
Qazaqstan Prezidenti dárigerlermen áńgimelesý barysynda otandastarymyzdyń densaýlyǵyn saqtaý úshin qajyrly eńbek etip jatqan meditsina qyzmetkerlerine alǵys aitty.
– Sizder pandemiiamen kúreste aldyńǵy shepte jumys istep júrsizder. Sizderge rizashylyǵymyz sheksiz. Kúndiz-túni tynbai eńbek etip jatyrsyzdar. Ókinishke qarai, Almatyda dárigerlerimizdi indetten qorǵai almadyq. Qazir qalyptasqan Tótenshe jaǵdaidy joiý úshin kúresýdemiz. Sondyqtan abai bolǵandaryńyz jón, eń aldymen, óz densaýlyqtaryńyzdy saqtańyzdar, – dedi Memleket basshysy.
Qazaqstan Prezidenti azamattarymyzdyń densaýlyǵyn saqtaý memlekettiń aldyndaǵy basty mindet ekenine toqtaldy. Onyń aitýynsha, búgingi daǵdarystan densaýlyǵy myqty ult qana aman-esen shyǵady.
– Keshendi sharalar qabyldaý kerek. Biz postkeńestik keńistikte qajetti sharalardy eń alǵashqylardyń biri bolyp qabyldadyq. Azamattarymyzǵa karantin rejimin saqtaýdyń ońai emes ekenin túsinemin. Biraq budan basqa jol joq. Qalai bolǵanda da osy aidyń aiaǵyna deiin karantin rejimin saqtaimyz. Arǵy jaǵyn taǵy da qarastyramyz. Múmkin, máseleni retteýdiń jańa ádisteri tabylar. Óitkeni halyq birtindep úilerinen shyǵýy kerek, – dedi Qasym-Jomart Toqaev.
Memleket basshysy ekonomikany qoldaýdyń mańyzdylyǵy jaiynda da aitty.
– Ekonomikalyq damý, shaǵyn jáne orta biznes týraly da oilaný kerek. Kúndelikti eńbek etip, tirshiligin jasap jatqan halyq óz múmkindikterinen aiyrylyp qalmaýy qajet. Bul jóninde kelesi aptadaǵy televiziialyq úndeýimde egjei-tegjeili aitamyn, – dedi Prezident.
Qasym-Jomart Toqaev dárigerlermen áńgimelesý kezinde sanitarlyq-epidemiologiialyq qyzmet júiesin reformalaý máselesine toqtaldy.
– Árbir daǵdarystyń óz sabaǵy bolady. Ony eskerý kerek. Biz qazirgi daǵdarys pen pandemiiadan sabaq alyp jatyrmyz. Shyn máninde, sońǵy jyldary sanitarlyq-epidemiologiialyq qyzmet júiesin damytýǵa jáne ony qoldaýǵa tiisti dárejede kóńil bólinbedi. Árine, onyń belgili bir sebepteri bar. Ony sizder jaqsy bilesizder. Biz qazir Densaýlyq saqtaý ministrliginiń jumysyn qaita qalyptastyryp jatyrmyz. Qajetti reformalar júrgiziletin bolady. Atap aitqanda, Bas sanitarlyq dárigerdiń ókilettigi kúsheitiledi, – dedi Memleket basshysy.
Meditsina qyzmetkerleri qoldaý kórsetkeni úshin memleket pen Prezidentke alǵys aitty. Sondai-aq olar dáriger-infektsionisterdiń eńbek aqylaryn arttyrý máselesin kóterdi.
– Biz qazir biýdjettiń barlyq qarajatyn shoǵyrlandyryp jatyrmyz. Sizder Qazaqstannyń osyǵan deiin qalyptasqan dástúrli naryǵynyń quldyraǵanyn túsinýge tiissizder. Biýdjetke túsýge tiisti qarjynyń negizgi bóligin tolyq ala almai otyrmyz. Degenmen osyndai kúrdeli qarjylyq qiyndyqtarǵa qaramastan, sizderdiń ótinishterińizdi qaraýsyz qaldyrmaimyz, – dedi Qasym-Jomart Toqaev.
