Qazaqstan parlamenti senatynyń tóraǵasy Qasym-Jomart Toqaev Nursultan Nazarbaev 2020 jyly ótýi tiis kezekti prezident sailaýyna túspeidi dep esepteidi. Bul týraly RIA Novosti jazdy.
"Ashyǵyn aitaiyn, men prezident Nazarbaev 2020 jylǵy prezident sailaýyna qatysatynyna senbeimin. Óitkeni ol aqyldy adam, óte parasatty. 2020 jyly bizde prezident sailaýy Nazarbaevtan basqa kandidattarmen ótedi dep oilaimyn", — dedi Toqaev Bi-bi-sidegi Hardtalk baǵdarlamasyna bergen suhbatynda.
Sonymen qatar senat spikeri bul óziniń "jeke pikiri" ekenin atap ótti.
"Árine, sailaýǵa bara ma, joq pa, bul prezident Nazarbaevtyń ózine bailanysty nárse. Alaida ol sailaýǵa túsetinine senbeitinimdi ashyq aitýǵa tiispin", — dep málimdedi Toqaev.
"Ózińiz 2020 jyly prezident sailaýyna túsýdi josparlap otyrsyz ba?" degen suraqqa Toqaev: "Olai aitpas edim" dep jaýap berdi.
"Eger prezident Nazarbaev tipti el prezidenti bolmasa da, ishki jáne syrtqy saiasatqa zor yqpal etetin bolady", — dep túiindedi senat basshysy.
Qazaqstannyń qazirgi prezidenti osy jazda 78 jasqa tolady. Ol 1991 jyldyń 1 jeltoqsanynda alǵashqy búkilhalyqtyq sailaýdyń qorytyndysy boiynsha prezident bolyp, sodan beri eldi basqaryp keledi. 2015 jyldyń 26 sáýirinde ótken sońǵy kezekten tys sailaýda memleket basshysy sailaýshylardyń 98% daýysyn ielenip, besinshi ret jeńiske jetti. Onyń ókilettigi 2020 jyldyń sáýirinde aiaqtalady. Kostitýtsiiaǵa sáikes, Nazarbaev Qazaqstannyń tuńǵysh prezidenti retinde bul laýazymǵa ómir boiy sailaýǵa túse alady.
